ცნობილი მუსიკოსი, კომპოზიტორი, შემსრულებელი და საქართველოში ჯაზის ფუძემდებელი თამაზ ყურაშვილი (თათუზა) 75 წლის ასაკში გარდაიცვალა.
თამაზ ყურაშვილმა დაამთავრა თბილისის სახელმწიფო კონსერვატორია. სხვადასხვა დროს იყო ფილარმონიის ანსამბლ „დიელოსა” და ანსამბლ „ჩანგის” წევრი. ასევე რადიოსა და ტელევიზიის კომიტეტის საესტრადო ორკესტრის სოლისტი, ჯაზ-ანსამბლის ხელმძღვანელი და საესტრადო-სიმფონიური ორკესტრის მთავარი დირიჟორი და სამხატვრო ხელმძღვანელი. დაწერილი აქვს მუსიკა ქართული მხატვრული ფილმებისა და სპექტაკლებისთვის („სუფთა დაფა”, „ისინი”, „ათვინიერებენ მიმინოს” და სხვ.)
1987 წლიდან მუშაობდა ამერიკის შეერთებულ შტატებში და თანამშრომლობდა ჯაზის ისეთ შემსრულებლებთან, როგორებიც არიან ჯონ ბერდი და სტივენ ჯორდანი. მონაწილეობა აქვს მიღებული მსოფლიოს მასშტაბით არაერთ კონცერტსა და ფესტივალში.
2011 წელს თბილისის დიდი საკონცერტო დარბაზის წინ თამაზ ყურაშვილის სახელობის ვარსკვლავი გაიხსნა. ეს იყო პირველი ვარსკვლავი, რომელიც საქართველოში ჯაზის სფეროს წარმომადგენელს მიეძღვნა.
Billboard საქართველო მწუხარებას გამოთქვამს თამაზ ყურაშვილის გარდაცვალების გამო და უსამძიმრებს მის ოჯახსა და ახლობლებს.
