ჯესი უილიამსი სერიალის – Only Murders in the Building სამსახიობო შემადგენლობას უერთდება. ეს ამბავი სერიალის მთავარი როლის შემსრულებელმა სელენა გომესმა Instagram-ზე გამოქვეყნებული პოსტით გაამხილა. სოციალურ ქსელში ატვირთულ ფოტოზე გომესი და Grey’s Anatomy-ის ვარსკვლავი საგრიმიოროში პოზირებენ.
Only Murders in the Building კომედიური დეტექტივია, რომელშიც სელენა გომესთან ერთად, მთავარ როლებს მარტინ შორტი და სტივენ მარტინი ასრულებენ. მაყურებელმა სერიალის ორი სეზონი უკვე იხილა. მეორე სეზონის ბოლოს, მაყურებლისათვის მოულოდნელად, ერთ-ერთ სცენაში პოლ რადიც გამოჩნდა. სიუჟეტის მიხედვით, მის პერსონაჟს გარდაცვლილს პოულობენ. როგორც ცნობილია Only Murders in the Building-ის ახალი ეპიზოდები სწორედ ამ მკვლელობის გამოძიებაზე იქნება ფოკუსირებული.
გარდა ჯესი უილიამსისა, სერიალის მესამე სეზონის სამსახიობო გუნდს Emily in Paris-ის ვარსკვლავი ეშლი პარკიც შეუერთდა.
Only Murders in the Building ახალი ეპიზოდებით კვლავაც Hulu-ზე დაბრუნდება, თუმცა პრემიერის თარიღი ჯერჯერობით უცნობია.
