ამერიკულმა მუსიკალურმა დუეტმა, სახელწოდებით Sparks ახალი სინგლი და მასზე გადაღებული კლიპი გამოუშვა. The Girl Is Crying in Her Latte – ასე ჰქვია სიმღერას და მუსიკალურ ვიდეოში მსახიობი ქეით ბლანშეტი მონაწილეობს.
მინიმალისტური მხატვრული ვიზუალის ვიდეოში ქეით ბლანშეტი სახასიათო იმიჯით ჩნდება. მსახიობს შავი სათვალეები და დიდი წითელი ყურსასმენები უკეთია. მის უკან კადრში კი Sparks-ის წევრები ჩანან. აღსანიშნავია, რომ დუეტი ძმებისაგან შედგება. ვიდეოს მსვლელობისას ბლანშეტი მუსიკის ფონზე ცეკვავს.
„ქეით ბლანშეტს გასულ წელს, პარიზში „სეზარის დაჯილდოებაზე“ შევხვდით“ – აღნიშნეს Sparks-ის წევრებმა გავრცელებულ პრეს რელიზში. „ერთი წლის შემდეგ, თანამედროვე ეპოქის ერთ-ერთი ყველაზე დიდი მსახიობი, ჩვენს ახალ ვიდეოში, სახელწოდებით The Girl Is Crying in Her Latte მონაწილეობს. ოცნებები მართლაც სრულდება.“
The Girl Is Crying in Her Latte ჯგუფის ამავე სახელწოდების ახალი ალბომის პირველი სიმღერაა. თავად სტუდიური ალბომი 26 მაისს გამოიცემა. დისკის გამოშვებასთან ერთად, Sparks ალბომის მხარდამჭერ მსოფლიო ტურნეს იწყებს. კონცერტები ევროპისა და სამხრეთ ამერიკის ქალაქებში 23 მაისიდან გაიმართება.
ნახეთ ვიდეო, რომელიც გადაღებულია Sparks-ის ახალ კომპოზიციაზე, სახელწოდებით The Girl Is Crying in Her Latte:
