„გინესის მსოფლიო რეკორდების წიგნის“ მიხედვით, The Weeknd სტატისტიკური მონაცემების მიხედვით მსოფლიოში ყველაზე პოპულარული არტისტია.
აღნიშნული სტატუსი არტისტს მას შემდეგ მიენიჭა, რაც Guinness-ის ორგანიზაციამ Spotify-ის მონაცემები გააანალიზა, მათ შორის ყოველთვიური მსმენელების რაოდენობა.
ამავდროულად, თებერვალში The Weeknd სტრიმინგ სერვის Spotify-ის ისტორიაში პირველი არტისტი გახდა, რომლის ყოველთვიური მსმენელების რაოდენობამ 100 მილიონს მიაღწია. Guinness-ის მოხსენების მიხედვით, ამჟამად არტისტის მსმენელთა რიცხვი კიდევ უფრო გაიზარდა და 111.4 მილიონს მიაღწია.
სარეიტინგო სიაში მეორე ადგილზე მაილი საირუსია. მას 82.4 ყოველთვიური მსმენელი ჰყავს. ეს ციფრი მას შემდეგ გაიზარდა, რაც მომღერალმა ახალი სტუდიური ალბომი Endless Summer Vacation გამოუშვა. Spotify-ის რეიტინგების მოწინავე არტისტთა სიაში ყოველთვიური მსმენელების რიცხვის მიხედვით ლიდერობენ შემდეგი არტისტები: შაკირა (81.6 მილიონი), არიანა გრანდე (80.6 მილიონი), ტეილორ სვიფტი (80. 2 მილიონი), რიანა (78.5 მილიონი) და ედ შირანი (77.5 მილიონი).
ერთი კვირის წინ, The Weeknd თავის მშობლიურ ქვეყანაში, კანადაში გამართული დაჯილდოების 2023 წლის Juno Awards-ის ტრიუმფატორი გახდა. მუსიკოსმა „წლის არტისტისა“ და „სიმღერების ავტორის“ ნომინაციებში გაიმარჯვა. ამავე დაჯილდოებაზე The Weeknd-ის სიმღერამ Sacrifice „წლის სინგლის“ ტიტული მოიპოვა, ხოლო არტისტის ალბომმა Dawn FM „წლის საუკეთესო პოპ ალბომის“ კატეგორიაში გაიმარჯვა.
