ქულიოს გარდაცვალების ოფიციალური მიზეზი ნარკოტიკული საშუალება ფენტანილია.
როგორც ოჯახის წარმომადგენელმა განაცხადა, ქულიოს ორგანიზმში აღმოჩნდა ჰეროინისა და მეტამფეტამინის კვალიც. მისი თქმით, რეპერს მწვავე ასთმისა და თამბაქოს მოხმარების ისტორია ჰქონდა, რამაც „დიდი როლი ითამაშა მის გარდაცვალებაში, რადგან მის სხეულს ბრძოლის უნარი აღარ ჰქონდა.”
რეპერი 2022 წლის 28 სექტემბერს მეგობრის სახლის სააბაზანოში გარდაცვლილი იპოვეს. იმ დროს ექიმები ვარაუდობდნენ, რომ ქულიო გულის გაჩერებით გარდაიცვალა.
ქულიოს სიმღერებიდან ექვსი ჰიტი ბილბორდის „ცხელ ასეულშია” შესული. მათ შორის ყველაზე ცნობილი Gangsta’s Paradise სამი კვირის განმავლობაში ჩარტის პირველ ადგილზე იყო. სიმღერამ ბილბორდის მუსიკალურ დაჯილდოებაზე „წლის სინგლის” ნომინაციაშიც გაიმარჯვა. ასევე დაიმსახურა გრემი „საუკეთესო რეპ შესრულებისთვის”. 2021 წელს Gangsta’s Paradise ყველა დროის საუკეთესო სიმღერების ასეულში დასახელდა.
რეპერის გარდაცვალების შემდეგ, 2023 წლის მარტში მისი სინგლი TAG ‘You It გამოვიდა. კომპოზიციაზე ქულიოს მეგობარმა DJ Wino-მ იმუშავა და ის იქნება პირველი სინგლი ქულიოს ახალი ალბომიდან სახელწოდებით LONG LIVE COOLIO. ალბომის გამოცემის თარიღი ჯერჯერობით უცნობია.
