ლეგენდარული ჯაზ პიანისტი აჰმად ჯამალი 92 წლის ასაკში გარდაიცვალა. როგორც The New York Times წერს, ჯამალი საკუთარ სახლში სიმსივნით გარდაიცვალა.
ცნობილი პიანისტისა და კომპოზიტორის უნიკალური ჟღერადობა შთაგონებად იქცა ისეთი დიდი ჯაზმენებისთვის, როგორებიც იყვნენ მაილს დევისი და მაკკოი ტაინერი. ისევე როგორც ჰიპ-ჰოპ არტისტებისთვის, რომლებმაც თავიანთ კომპოზიციებში ჯამალის მუსიკა გამოიყენეს. Მათ შორის არიან J Dilla (სიმღერა Stakes Is High) , Nas (The World is Yours) და DJ Premiere (Soliloquy of Chaos).
აჰმად ჯამალს თავიანთ შთაგონებად ასახელებდნენ ჰერბი ჰენკოკი და კით ჯარეტიც. ლეგენდარულმა მაილს დევისმა კი (რომელიც ჯამალის კომპოზიციებს უკრავდა) ერთხელ თქვა: “მთელი ჩემი შთაგონება აჰმად ჯამალისგან მოდის”.
აჰმად ჯამალი 1930 წელს პიტსბურგში დაიბადა. მისი ნამდვილი სახელია ფრედერიკ რასელ ჯონსი. ფორტეპიანოზე დაკვრა ადრეულ წლებში დაიწყო. 1950 წელს იგი ჩიკაგოში გადავიდა. ისლამის მიღებამ კი მუსიკოსს ახალი სასცენო სახელი მოუტანა – აჰმად ჯამალი. მისმა ტრიომ Three Strings (ფორტეპიანო-გიტარა-ბასი) ლეგენდარული პროდიუსერის ჯონ ჰამონდის ყურადღება მიიქცია და მათ კონტრაქტი გაუფორმა, რაც დიდი კარიერის დასაწყისი გახდა.
პირველი სტუდიური ალბომი Ahmad Jamal Plays მუსიკოსმა 1955 წელს გამოუშვა. 1958 წელს კი ჩიკაგოს ღამის კლუბში ჩაწერილი ლაივ ალბომი At the Pershing: But Not for Me გამოვიდა, რომელმაც ჯამალის ჟღერადობა მსოფლიოს გააცნო. ალბომმა ორ კვირაზე მეტი გაატარა ბილბორდის 200 ალბომის ჩარტში, რაც ალბომებისთვის იშვიათი შედეგია. ალბომში შედიოდა პიანისტის ყველაზე ცნობილი კომპოზიცია Poinciana.
კარიერის განმავლობაში ჯამალს გამოცემული აქვს 60-ზე მეტი ალბომი და მინიჭებული აქვს ჯაზის ცოცხალი ლეგენდის სტატუსი.
ჯამალმა მისი უკანასკნელი ალბომი 2019 წელს ჩაწერა. ალბომში შევიდა მისი ყველაზე ცნობილი კომპოზიციის Poinciana-ს სოლო ვერსიაც, რაც ამავე დროს მუსიკოსის დიდი კარიერის სიმბოლურ დასასრულად იქცა.
Მოუსმინეთ აჰმად ჯამალის Poinciana-ს
