5 მაისს, Holoseum-ში ქართული მუსიკალური პროექტის – QUEMMEKH-ის კონცერტი გაიმართა. ჯგუფი ცოცხალი შესრულების ფორმატით ახალი ალბომის „ნოსტალგიას“ გამოშვების შემდეგ პირველად წარდგა. QUEMMEKH-მა შეასრულა როგორც თავისი მსმენელისათვის უკვე კარგად ნაცნობი ტრეკები, ასევე ახალი კომპოზიციები.
მუსიკალური პროექტის წევრები ამბობენ – „ქვემეხი არის მუსიკოსებისა და ხელოვანების დაჯგუფება, ვისაც აქვთ ამბიციური მიზნები, შეაღწიონ ადამიანების გონებაში და იქ მყოფი აზრები შეარყიონ”. შემოქმედების მიღმა არსებული იდეები და ფასეულობები კარგად ჩანს QUEMMEKH-ის კონცერტებზეც, რადგან პროექტი მსმენელს მხოლოდ მუსიკალურ საღამოებს არ სთავაზობს – თითოეულ ლაივზე დიდი ყურადღება ეთმობა ვენიუს, ვიზუალურ გაფორმებას, ზოგად ატმოსფეროს და იმ გზავნილებს, რომელსაც ბენდი სცენიდან ახმოვანებს. სწორედ QUEMMEKH-ისთვის ჩვეული შოუების გაგრძელება ვიხილეთ Holoseum-ში. Holoseum-ის ინტერაქციული სივრცეში მუსიკალურმა კოლექტივმა აუდიო-ვიზუალური ინსტალაცია წარადგინა, რომელიც QUEMMEKH-ის ერთგვარი ქრონიკებია და როგორც თავად ჯგუფის წევრები აფასებენ – „ქვემეხის სამყაროს გადმოსცემს.“
სანდრო ქერაული, QUEMMEKH-ის ფრონტმენი, ვოკალისტი:
„დღეს ახალი ალბომიდან რამდენიმე ტრეკი პირველად დავუკარით. ამ ყველაფერს კი ვიზუალური ინსტალაცია ახლდა, რომლის შექმნაშიც ლევან გაგილაძე დაგვეხმარა. ამ აუდიო ვიზუალური მუზეუმის მთელს სამს სართულზე სულ „ქვემეხის“ მასალა იყო. მოსულ მსმენელს შეეძლო ჩვენი არქივი ენახა – როგორ ვცხოვრობთ, რას ვაკეთებთ. ზოგადად ყველაფერს ვიღებთ ხოლმე და დღეს ეს ჩანაწერები ვიდეო ინსტალაციის ფორმატის გამოფენად იქცა.“
სანდრო ქერაული გვიყვება, რომ კონცერტი ხუთ დღეში დაიგეგმა და შესაბამისად ლაივისთვის მზადება ცოცხალი პროცესი იყო, რომელშიც მუსიკალური კოლექტივის მეგობარი არტისტები აქტიურად იყვნენ ჩართული.
რაც შეეხება QUEMMEKH-ის ახალ ალბომს, ბენდმა „ნოსტალგია„ 2023 წლის მარტში გამოუშვა და მასში 12 ტრეკი გაერთიანდა. როგორც ალბომის გამოცემისას სანდრო ქერაულმა „Billboard საქართველოსთან“ ინტერვიუში თქვა, მასზე მუშაობისას ბევრი ძველი ტრეკი გაცოცხლდა. „ეს ალბომი ნოსტალგიაზე, სინანულზე და ისევ რაღაცის იმედზეა. პოლიტიკურად, თუ შინაგანი განცდების თვალსაზრისით როგორი არეულებიც ახლა ჩვენ ვართ, ალბომიც ასეთივე ქაოსურია“ – აღნიშნა არტისტმა.
მოუსმინეთ QUEMMEKH-ის ახალ ალბომს სახელწოდებით – „ნოსტალგია“ :
