ჰეილი ბიბერი შვილის ყოლაზე საუბრობს.
„ამაზე სულ ვტირი,” – უთხრა 26 წლის მოდელმა The Sunday Times-ს. Ძალიან მინდა, შვილები მყავდეს, მაგრამ მეშინია. ისიც საკმარისია, რასაც ხალხი ჩემზე და ჩემს ქმარზე ლაპარაკობს. ვერ წარმომიდგენია, რომ მათ საბაბი მივცე, ასეთი რაღაცები ბავშვზეც თქვან. ჩვენ მხოლოდ ის შეგვიძლია, რომ მაქსიმალურად კარგად აღვზარდოთ ისინი, რომ თავი უსაფრთხოდ იგრძნონ.”
ეს არ არის პირველი შემთხვევა, როცა ჰეილი ამ თემაზე საუბრობს. შარშან მოდელი ამბობდა, რომ ქორწინება და ოჯახის დაგეგმვა საკმაოდ რთული საქმეა.
„ჯასტინი ის ადამიანია, რომელთანაც ყოველთვის მიმეჩქარება. შეიძლება სადმე გავფრინდე, ან საქმეზე წავიდე, მაგრამ ერთი სული მაქვს, უკან როდის დავბრუნდები. Მე მგონია, რომ ეს იმ ძალისხმევის შედეგია, რომელიც ორივე მხარემ ჩავდეთ. დღის ბოლოს ის ჩემი საუკეთესო მეგობარია, თუმცა ამის მიღწევას დიდი სამუშაო სჭირდება. და ვიცი, რომ როცა ამ სურათს ბავშვები დაემატებიან, ამას უკვე სულ სხვა შრომა დასჭირდება.”
შვილების შესახებ აქამდე ჯასტინ ბიბერსაც უსაუბრია. 2020 წელს ელენ დეჯენერესთან სტუმრობისას მომღერალმა თქვა, რომ იმდენ შვილს იყოლიებს, რამდენსაც ჰეილი გააჩენს. „მე ვისურვებდი, რომ ჩემი პატარა ტომი მყავდეს. მაგრამ ეს მისი სხეულია და როგორც ის გადაწყვეტს… მგონი, მას ცოტა უნდა.”
ჯასტინ ბიბერი აქტიურად აღარ ჩანს მას შემდეგ, რაც გაამხილა, რომ რამსეი-ჰანტის სინდრომი აქვს, რაც მისი სახის ნაწილობრივ პარალიზებას იწვევს. დიაგნოზის გამო მომღერალს ტურნეს გაუქმებაც მოუწია.
