25 მაისს, საგურამოში მდებარე კოსმოსური კომპლექსის ტერიტორიაზე მუსიკალური ფესტივალი 4GB გაიხსნა. ფესტივალი, რომელიც 2011 წლიდან ტარდება, ელექტრონულ მუსიკაზეა ფოკუსირებული, თუმცა წელს 4GB-ის პროგრამას Leno Stage დაემატა, რომელმაც ქართული ალტერნატიული მუსიკალური სცენის გამორჩეული არტისტები გააერთიანა. Komma, 4D Monster Lobsters, Killages, Young Georgian Lolitaz, LOUDspeakers, Skazz, „დაგდაგანი“, Tamada – ეს ის ბენდებია, რომელიც 4GB-ის მეორე საფესტივალო დღეს, 26 მაისს მსმენელის წინაშე წარდგა. აღსანიშნავია, რომ Leno Stage-ის ლაინაფში იყვნენ ე.წ. ნიუქამერი ბენდებიც – Process და Postalion.
გიორგი გვარჯალაძე, Leno Records-ის დამფუძნებელი:
„ეს ფესტივალი განსაკუთრებული მნიშვნელობის არის. ის ჩვენი მეგობრის, გიორგი ბაქანიძის ხსოვნას ეძღვნება. უშუალოდ ფესტივალის ორგანიზატორი არ ვარ, თუმცა დაარსების დღიდან ვუჭერ მხარს. როდესაც ფესტივალი დაიწყო, მაშინ ვერავინ იფიქრებდა, რომ წლების შემდეგ ის ასიათასობით მსმენელს გააერთიანებდა. წელს ფესტივალის პროგრამას Leno Stage დაემატა. ამ სცენამ გააერთიანა LENO Records-ის არტისტები და ასევე ის მუსიკოსები და ბენდები, რომლებიც უშუალოდ ჩვენს ლეიბზე არ არიან, მაგრამ მათთან ვმეგობრობთ, მუსიკას ვუწერთ, ლაივ საუნდს ვუკეთებთ და ასე შემდეგ. ეს ბენდები კონკრეტულად ამ ფესტივალისთვის რეპეტიციას დაახლოებით ერთი თვე გადიოდნენ.“
კონცერტი Leno Stage-ზე ათი საათის განმავლობაში მიმდინარეობდა. თითოეულმა ბენდმა დაახლოებით 50-წუთიანი მუსიკალური პროგრამა წარადგინა. გარდა მრავალფეროვანი შემადგენლობისა, ეს პერფორმანსები საუნდ სისტემითა და ჟღერადობით გამოირჩეოდა.
„Billboard საქართველო“ ლაინაფის მონაწილე მუსიკოსებს ესაუბრა. 4GB-ის ფესტივალის კონცეფციიდან გამომდინარე, Leno Stage-ზე გამოსვლა თითოეული მათგანისათვის გამორჩეული გამოცდილება აღმოჩნდა.
ცოტნე გორგოშიძე, „დაგდაგანი“:
„მუსიკოსებისათვის ყველა ფესტივალი სასიამოვნო გამოცდილებაა, როდესაც აუდიტორიის წინაშე სხვა ბენდებთან ერთად გამოდის. Leno Stage-მა წელს საკმაოდ ბევრი არტისტი გააერთიანა, რაც ლაივამდე თანამშრომლობას, რეპეტიციებს გულისხმობდა. პანდემიის შემდეგ ბევრი რამ შეიცვალა, მსმენელს სურს, მუსიკა ცოცხლად მოისმინოს და აუდიტორიაც მეტად აქტიურია. დღევანდელი კონცერტიც მსმენელის ასეთივე ჩართულობით გამოირჩეოდა.“
ბექა თევდორაშვილი, 4D Monster Lobsters:
„უკვე მრავალი წელია 4GB ტარდება და ამ წელს Leno Stage-ის დამატებამ საინტერესო სინთეზი შექმნა. ჩვენთვის, როგორც ბენდისათვის, როგორც არტისტებისათვის ეს განსაკუთრებული გამოცდილებაა. ყოველთვის გვინდოდა, რომ შეგვექმნეს მუსიკა, რომელიც არა რაიმე კონკრეტულ სეგმენტზე იქნებოდა გათვლილი, არამედ საინტერესოდ მოსასმენი იქნებოდა ყველასათვის. 4GB-ის ფესტივალზე ალტერნატიული მუსიკალური ბენდების მონაწილეობა, ვფიქრობ, სწორედ ამ იდეასთან არის კავშირში.“
ლევან ლაუდაძე, LOUDspeakers:
„პირველ რიგში მინდა 4GB-ის მიმართ ჩემი, როგორც მსმენელის დადებითი დამოკიდებულება გამოვხატო. Წლებია, ამ ფესტივალზე დავდივარ და განსაკუთრებით მიხარია, რომ ახლა მისი მონაწილეც ვარ. ყოველთვის მინდოდა ისეთ ფესტივალებზე დამეკრა, რომელიც შესაძლოა ერთი შეხედვით ჩვენს მუსიკალურ მიმდინარეობს არ შეესაბამებოდეს. ვფიქრობ, რომ მრავალფეროვნება მსმენელისთვისაც საინტერესოა და წელს Leno Stage-მა ეს მრავალფეროვნება შემოიტანა. რაც შეეხება LENO Records-ს, ის ჩვენი ჯგუფისათვის მეორე სახლია. ამ სივრცესთან არამხოლოდ თანამშრომლობა, არამედ დიდი მეგობრობა გვაკავშირებს. LENO Records-თან ერთად ამ კონცერტისათვის მზადების და ორგანიზების პერიოდი საკმაოდ შრომატევადი იყო. შედეგად მსმენელს საშუალება ჰქონდა ლაივ პერფორმანსები სრულყოფილი ჟღერადობით მოესმინა. “
საბა ვაშაყმაძე,Skazz:
„4GB ყოველთვის ერთ-ერთ გამორჩეულ სივრცედ მიმაჩნდა. ახლა, როდესაც ელექტრონული მუსიკის ფესტივალზე ჩვენი ბენდი აღმოჩნდა, ეს საკმაოდ საინტერესო გამოცდილებაა, რადგან აქ სულ სხვანაირი აუდიტორიაა, განსხვავებული ენერგეტიკა და გარემოა. მნიშვნელოვანია არტისტების თანამშრომლობა და ერთობლივი მეგობრობა მსმენელთან. ზოგადად, ბოლო პერიოდში, მუსიკალური ინდუსტრია ვითარდება – ჩართულობა და ინტერესიც მეტია. ამას სწორედ ის განაპირობებს, რომ მუსიკალური ჟურნალები გაჩნდა, ფესტივალები იმართება და იმ ადამიანებისა და პლატფორმების რიცხვი იზრდება, ვინც ქართველი მუსიკოსებით, ადგილობრივი ალტერნატიული მუსიკალური სცენით ინტერესდება.“
Leno Stage-ის კონცერტი Tamada-მ დახურა, რომლის შესრულება ერთგვარი დამაკავშირებელი ჟღერადობა იყო 4GB-ის ჟანრობრივ კონცეფციასა და Leno Stage-ზე გამომსვლელი ბენდების მუსიკას შორის.
რაც შეეხება 4GB ფესტივალს, ის 27 მაისს დაიხურა. ფესტივალის წლევანდელ პროგრამას დეტალურად გაეცანით ბმულზე.
