ბრუკლინის საჯარო ბიბლიოთეკამ რეპერ Jay-Z-ის ცხოვრებისა და შემოქმედებისადმი მიძღვნილი გამოფენა გახსნა. The Book of HOV – ასე ჰქვია გამოფენას. აღსანიშნავია, რომ ეს ფრაზა არტისტის ერთ-ერთი ტრეკის ტექსტიდან არის.
გამოფენა აერთიანებს მუსიკოსის პირად და მის მუსიკალურ კარიერასთან დაკავშირებულ ნივთებს. ექსპოზიციაზე წარმოდგენილ არის აუდიო ჩანაწერები, აქამდე უცნობი ფოტოები, სასცენო კოსტიუმები, ჯილდოები, ვიდეოები და ასე შემდეგ.
„ბრუკლინის საჯარო ბიბლიოთეკა, მათ შორის ბრუკლინის ისტორიის ცენტრი, ბრუკლინის ისტორიის უდიდეს და ფასეულ ისტორიას ინახავს. Jay-Z კი სწორედ ამ ისტორიის ნაწილია.“ – ბრუკლინის საჯარო ბიბლიოთეკის ხელმძღვანელმა ლინდა ჯონსონმა Billboard-თან საუბრისას აღნიშნა. „ჩვენ ვამაყობთ, რომ გვაქვს საშუალება პატივი მივაგოთ მის მუსიკას, პოეზიას და სიტყვებს. იმედი გვაქვს, რომ გამოფენა დამთვალიერებლებს შთააგონებს და საკუთარი ოცნებების ასრულებისაკენ უბიძგებს.“
გამოფენას თავად Jay-Z და ბიონსეც დაესწრნენ. ექსპოზიცია მოინახულეს რეპერის ცნობილმა კოლეგებმა და მეგობრებმაც.
ბრუკლინის საჯარო ბიბლიოთეკაში მიმდინარე გამოფენა 14 ივლისს ოფიციალურად გაიხსნა და მის დათვალიერებას მსურველები უფასოდ შეძლებენ.
