Რიანა და „პუმა” ერთობლივ ბიზნესში დაბრუნდნენ. რამდენიმეწლიანი პაუზის შემდეგ მომღერალმა ფეხსაცმლის ბრენდ Fenty-ს დაბრუნება ახალი სნიქერსით დააანონსა. სპორტული ფეხსაცმლის სახელწოდებაა Avanti.
რიანამ სოციალურ მედიაში ახალი პროდუქტი წარადგინა, რომელიც გაყიდვაში 15 სექტემბრიდან გამოვა. ფეხსაცმელს რეკლამას თავად მომღერალი უკეთებს. „ჩვენ დავბრუნდით…” – წერს რიანა. „წარმოგიდგენთ Avanti-ს #FENTYxPUMA.”
Რიანამ სარეკლამო ვიდეოც დაპოსტა, სადაც ფეხსაცმლის ორი სხვადასხვა მოდელი ჩანს. ერთი მათგანი შავი, ხოლო მეორე მბრწყინავი ვერცხლისფერი მასალითაა შექმნილი. ორივე მათგანს წინ Fenty x Puma-ს ლოგო აქვს დატანილი. „ვოგის” თანახმად, ფეხსაცმელი შთაგონებულია „პუმას” ძველი დიზაინებით, კონკრეტულად კი, King football და Easy Rider running მოდელებით.
Fenty-სა და „პუმას” თანამშრომლობა 2015 წლიდან იწყება. Მას შემდეგ ორი წლის განმავლობაში ბრენდებმა ფეხსაცმლისა და ტანსაცმლის არაერთი დიზაინი შექმნეს. 2017 წელს კი მათი თანამშრომლობა დროებით შეჩერდა, რადგან რიანამ მუშაობა Fenty Beauty-სა და Savage x Fenty-ის მიმართულებით განაგრძო.
„ეს ოჯახის შეკრებას ჰგავს,” – აღნიშნავს რიანა. „პუმასთან დაბრუნება, ახლა უკვე დედის ამპლუაში, ახალი პერსპექტივებისა და იდეების განხორციელების საშუალებაა.”
ერთ-ერთი ასეთი ახალი პერსპექტივა ფეხსაცმლის ზომების დიაპაზონია. სტანდარტულ ზომებთან ერთად Avanti ბავშვის ზომებშიც იქნება ხელმისაწვდომი. „ამჯერად ჩვენი ნამუშევრები ბავშვებზეც განვავრცეთ, რადგან მე ეგოისტურად მინდა, რომ ჩემს ბიჭებს ყველაფერი ჰქონდეთ, რაც მათ დედასა და მამას აცვიათ ან ქმნიან,” – დაამატა რიანამ.
ნახეთ რიანას პოსტები
