Nini Iris ამერიკული „ვოისის” რინგის ტურის გამარჯვებულია. მან თავისი გუნდის წევრთან სოფია ჰოფმანთან ერთად Blondie-ს Heart of Glass შეასრულა. დუეტმა ჟიურის მხრიდან დიდი ოვაციები დაიმსახურა და მენტორები მათ ფეხზე წამოუდგნენ. „ღმერთო ჩემო, ეს ისეთი კარგი იყო, “ – მიმართა კონკურსანტებს გვენ სტეფანიმ. „ნინი, შენ საოცარი ხარ.” მენტორმა რება მაკენტაირმა კი ორივე გამომსვლელი შეაქო, მაგრამ აღნიშნა, რომ ამ შემთხვევაში არჩევანს ნინიზე გააკეთებდა. თუმცა საბოლოო სიტყვა გამომსვლელების მენტორს ნაილ ჰორანს ეკუთვნოდა. მისი გადაწყვეტილებით რინგის გამარჯვებული ქართველი მომღერალი გახდა.
„ნინი ავირჩიე, რადგან მას რაღაც განსაკუთრებული აქვს. ისეთი რამ აქვს, რის გამოც თვალს ვერ მოწყვეტ. მუსიკალურ სამყაროში დიდი სიცარიელეა ისეთი მუსიკოსისთვის, როგორიც ნინია. და ერთადერთი, რაც მას სჭირდება, პირდაპირი გზით სვლაა.” – აღნიშნა ნაილ ჰორანმა ინტერვიუში.
რინგის შემდეგ Nini Iris „ვოისის” სცენაზე უკვე ნოკაუტის ტურში გამოვა. ამ რაუნდში გუნდის წევრები ისევ ერთმანეთის პირისპირ წარდგებიან, თუმცა რინგისგან განსხვავებით, ისინი ცალ-ცალკე, ერთმანეთისგან განსხვავებულ სიმღერებს შეასრულებენ. გამარჯვებულს ისევ გუნდის მენტორი დაასახელებს.
ნახეთ Nini Iris-ის გამოსვლა რინგის ტურში:
