საქართველოს დროით 12 დეკემბრის დილის 5 საათზე ტელეარხ NBC-ზე ამერიკული The Voice-ის ნახევარფინალი შედგება. რჩეული 9 კონკურსანტი მაყურებლის და მენტორების წინაშე წარდგება და მუსიკალურ ნომრებს შეასრულებს. ცნობილია, რომ კონკურსის ერთ-ერთი ნაწილი ტეილორ სვიფტის მუსიკალურ შემოქმედებას მიეძღვნება – მონაწილეებისაგან შემდგარი ტრიოები პოპ ვარსკვლავის სიმღერებს შეასრულებენ. ცხადია ჯერჯერობით უცნობია, თუ კონკრეტულად რომელი სიმღერები შესრულდება, თუმცა ტეილორ სვიფტის აქტუალობიდან გამომდინარე, The Voice მაყურებლებს განსაკუთრებულ ტურს ჰპირდება. ნახევარფინალის დასრულების შემდეგ ხმის მიცემის ეტაპი დაიწყება და მაყურებლები თავის რჩეულებს გამოავლენენ.
ნახევარფინალის ერთ-ერთი მონაწილეა ქართველი მუსიკოსი Nini Iris, რომელიც კონკურსის ამ მნიშვნელოვან ეტაპზე სწორედ მაყურებელთ ხმებით გადავიდა. ნინიმ გასულ ტურში The Cure-ის ცნობილი სიმღერა – Lovesong შეასრულა.
The Voice-ის გულშემატკივრები ნახევარფინალს განსაკუთრებით ელიან, რადგანაც ტეილორ სვიფტი 2023 წელს მსოფლიო მუსიკალური სცენის და პოპ კულტურის ერთ-ერთი ყველაზე მნიშვნელოვანი ვარსკვლავია. გარდა იმისა, რომ მომღერალი Billboard-ის ჩარტების ლიდერია, მისმა საკონცერტო ტურნემ გაყიდვების რეკორდები მოხსნა. ახლახან ტეილორ სვიფტი გავლენიანმა გამოცემა Time-მა წლის ადამიანად დაასახელა. ამას წინ უძღოდა ამერიკული Forbes-ის ყოველწლიური სარეიტინგო სიის გამოვლენა, რომელშიც სვიფტმა მედიისა და შოუბიზნესის ინდუსტრიაში ყველაზე გავლენიან ქალებს შორის პირველი ადგილი დაიკავა.
რაც შეეხება The Voice-ს, როგორც უკვე აღინიშნა, ნახევარფინალის დასრულების შემდეგ მაყურებლებს საშუალება ექნებათ, რჩეული მონაწილის წარმატება მნიშვნელოვნად განსაზღვრონ.
შეერთებულ შტატებში მცხოვრებ გულშემატკივრებს ხმის მიცემა შეუძლიათ, როგორც The Voice-ის ოფიციალური აპლიკაციიდან, ასევე NBC-ის ვებ-გვერდის მეშვეობით, ბმულზე – https://voice.vote.nbc.com.
