ბოლო ორი ათწლეულის განმავლობაში პირველად, ბილი ჯოელი ახალი სინგლით დაბრუნდა. Მისი სახელწოდებაა Turn the Lights Back On. მუსიკალურ პოდკასტში სახელწოდებით Audacy Check In ჯოელმა და სინგლის თანაავტორმა ფრედი უექსლერმა სიმღერაზე მუშაობის პროცესი განიხილეს.
ჯოელმა გულახდილად თქვა, რომ დიდი ხნის განმავლობაში მას მუსიკისადმი ლტოლვა დაკარგული ჰქონდა. „მუსიკაში მთავარი ხალისის პოვნაა. როკ-ენ-როლი სახალისოა და მეც ვერთობოდი, თუმცა შემდეგ თითქოს ეს შეგრძნება დავკარგე” – ამბობს ჯოელი.
მან ასევე აღნიშნა, რომ უექსლერთან მოულოდნელი კავშირი ის დამატებითი გარემოება გახდა, რამაც სტუდიაში დაბრუნებისაკენ უბიძგა. „სხვა ადამიანებსაც უცდიათ, რომ დავბრუნებულიყავი, მუშაობა დამეწყო და ახალი სიმღერები ჩამეწერა, თუმცა ყოველთვის უარზე ვიყავი. ამას გულმოდგინედ ვარიდებდი თავს, რადგან სიმღერების წერის პროცესი სიამოვნებას აღარ მანიჭებდა”.
როდესაც ჯოელმა შეიტყო, თუ რაზე მუშაობდა უექსლერი, მასთან კავშირი მაშინვე იგრძნო. „მელოდია, აკორდები, მათი განვითარება, დროის ფაქტორიც კი ის გარემოება იყო, რამაც მიმიზიდა და ასე დავუკავშირდი კვლავ მუსიკას” – განმარტა ბილი ჯოელმა. „მუსიკის ტექსტს რაც შეეხება, ეს აზრები ჩემშიც იყო.”- ამბობს მუსიკოსი.
სიმღერას Turn the Lights Back On ბილი ჯოელი პირველად 4 თებერვალს, გრემის 2024 წლის დაჯილდოებაზე შეასრულებს. ცერემონიას ტელეარხი CBS პირდაპირ ეთერში გადასცემს.
