ზუსტად 500 კვირის წინ, 2014 წლის 19 ივლისს, Billboard-მა ახალი ჩარტი, Artist 100 წამოიწყო. უკვე 10 წელია, რაც ჩარტი აფასებს შემსრულებლების აქტუალურობას ისეთი ძირითადი საზომებით, როგორებიცაა ალბომების გაყიდვა, სიმღერების გაყიდვა, რადიოტრანსლაცია და სტრიმინგი. ამ კრიტერიუმების მიხედვით Artist 100 მუსიკოსების პოპულარობის ყოველკვირეულ რეიტინგს ადგენს.
ამ დროის განმავლობაში მხოლოდ ერთადერთმა შემსრულებელმა მოახერხა, ჩარტის ისტორიის ხუთასი კვირიდან ხუთასივეჯერ მოხვედრილიყო მასში და ეს არის დრეიკი.
ბოლო კვირის (2024 წლის 3 თებერვლის) მონაცემებით, დრეიკი Artist 100-ში მეოთხე ადგილს იკავებს, რაც წინა კვირასთან შედარებით ორი ადგილით გაუმჯობესებული შედეგია. ეს Billboard 200-ში მისი რვა ალბომისა და Billboard Hot 100-ში 5 სიმღერის მოხვედრის დამსახურებაა.
ერთადერთი შემსრულებელი, რომელსაც ბოლო კვირის მონაცემებით Billboard 200-ში უკეთესი შედეგი აქვს, ტეილორ სვიფტია (ათი ალბომი). სვიფტი ამჟამად Artist 100-ის პირველ ადგილს იკავებს რეკორდული 96-ე კვირის განმავლობაში. რაც შეეხება დრეიკს, ჯამში ჩარტში გატარებული 500 კვირიდან პირველ ადგილზე ის 38 კვირის განმავლობაში იყო, რითაც მხოლოდ სვიფტს ჩამორჩება.
გთავაზობთ შემსრულებლების რეიტინგს Artist 100-ში გატარებული კვირების მიხედვით (2024 წლის 3 თებერვლის მონაცემებით):
- 500, დრეიკი
- 496, ტეილორ სვიფტი
- 493, ედ შირანი
- 478, ბრუნო მარსი
- 466, ჯასტინ ბიბერი
- 464, ემინემი
- 455, Imagine Dragons
- 450, ჯეისონ ალდენი
- 446, The Weeknd
- 431, კრის სტეპლტონი
- 427, მეტალიკა
- 425, არიანა გრანდე
ასევე, ტეილორ სვიფტს ყველაზე მეტი კვირა აქვს გატარებული Artist 100-ის ტოპ 5-ში (სვიფტი – 195 კვირა, დრეიკი – 188), დრეიკს კი ტოპ 10-ში (დრეიკი – 313 კვირა, სვიფტი – 256) და ასევე ტოპ 40-ში (დრეიკი – 484 კვირა, სვიფტი – 448).
