Saffron Soul-ის მუსიკას კონკრეტულ ერთ ჟანრს ვერ მიაკუთვნებ. ეს არის მუსიკალური ჟღერადობების შერწყმა, რაც ჯგუფს საინტერესო და ავთენტურ ხასიათს სძენს. მათი მუსიკა ემბიენთის, ტრიპ-ჰოპისა და ელექტრონული მუსიკის სინთეზია, რაც საერთო ჯამში ქართულ მუსიკალურ სივრცეში უნიკალურ იდენტობას ქმნის.
Saffron Soul პირველად „ელექტრონავტებზე” გამოჩნდა და მას შემდეგ ჯგუფის წევრები საკუთარ შემოქმედებას აქტიურად ავითარებენ. ამ ეტაპზე Მათი შემოქმედება მოიცავს ერთ ალბომს, რომლის სახელწოდებაა Tale და ორ დამოუკიდებელ სინგლს, (Unspoken Words / Stranger) გაზაფხულზე კი ბენდი ევროპული ტურნესთვის ემზადება.
ლანა ლობილაძე – Saffron Soul-ის ვოკალისტი:
„Saffron Soul რეალურად სამი წელია რაც შეიქმნა. თავდაპირველად ნიკას და ნოეს ჰქონდათ გეგმაში ასეთი პროექტის გაკეთება. თავად სხვადასხვა ჯგუფებში უკრავდნენ, თუმცა საკუთარი ბენდის შექმნა უნდოდათ, რისთვისაც ვოკალისტი სჭირდებოდათ და მე მომაკითხეს. იმ დროს მე საკუთარ სიმღერებს ვწერდი, თუმცა ისინი არ გამომიქვეყნებია. ჯერ ჩვენ სამმა დავიწყეთ და მერე ელექტრონული ნაწილით უჩა შემოგვიერთდა. თავიდან აკუსტიკური პროექტი გვქონდა ჩაფიქრებული, მაგრამ საბოლოოდ ელექტრონულ-აკუსტიკური ვერსია შეიქმნა. ჩვენი მუსიკალური მოძრაობა „ელექტრონავტებიდან” დაიწყო – ფესტივალიდან, რომელსაც სერგი გვარჯალაძე წლებია აკეთებს. პირველად სწორად იქ შედგა ჩვენი დებიუტი. ეს იყო შარშანწინ. გაზაფხულზე დედაენაში გვქონდა კონცერტი და ამ სივრცეში ახლა მეორედ ვუკრავთ.”
ბენდის წევრები არიან გიტარისტი ნიკა გოგიაშვილი, ბასისტი – ნოე ჭელიძე, ელექტრონულ ნაწილზე უჩა გუგუნავა მუშაობს ვოკალისტი კი ლანა ლობილაძეა. სიმღერების ნაწილი ლანას შექმნილია, ნაწილი კი ერთად მუშაობის პროცესში შექმნეს. ტექსტების ავტორი ვოკალისტი ლანა ლობილაძეა, არანჟირება კი უჩა გუგუნავას ეკუთვნის.
Saffron Soul უახლოეს მომავალში, კერძოდ კი მარტსა და აპრილში ევროპის ქვეყნებში პირველ ტურნეს გეგმავს.
„ევროპის ტურნე საკმაოდ დიდი სიურპრიზი იყო ჩვენთვის. მეგობარი გვყავს, რომელიც ძალიან აქტიური მუსიკალური პროდიუსერია. უკრაინელია და ახლა მონტენეგროში ცხოვრობს. ყოველთვის გვადევნებდა თვალყურს, ჩვენი შემოქმედება აინტერესებდა და ბოლოს, ჩვენგან დამოუკიდებლად სხვადასხვა მუსიკალურ პროდიუსერებს და კლუბებს ასმენინებდა ჩვენს სიმღერებს და აღმოჩნდა რომ ამ ყველაფერმა დიდი დაინტერესება გამოიწვია. თავად შემოგვთავაზა, რომ პრომო-ტური გაგვეკეთებინა. კონცერტები ევროპის რამდენიმე ქვეყანაში დაიგეგმა: იქნება გამოსვლები ბერლინში, მონტენეგროს სამ ქალაქში და სლოვაკეთის ორ ქალაქში, ასევე მიმდინარეობს მოლაპარაკებები ოსლოს შესახებ. 10 დღიანი ტურნე დაახლოებით 28 მარტიდან 6 აპრილამდე გაგრძელდება, სადაც ჩვენ ალბომში შესულ და ახალ სიმღერებს წარვადგენთ.”
მოისმინეთ Saffron Soul-ის სიმღერა When You Are Gone
