ლეგენდარული ბრიტანული ჯგუფი Queen უკვე ახლოსაა თავისი კატალოგის გაყიდვასთან და წყაროს მიერ მოწოდებული ინფორმაციით, არსებობს მისი შეძენის მსურველიც, რომლის ვინაობაც ამ ეტაპზე უცნობია.
მუსიკალურ აქტივებს, რომლებიც მოიცავს ჯგუფის ჩანაწერებს, ასევე შემოსავლების საგამომცემლო და დამატებით ნაკადებს, Queen 1.2 მილიარდ დოლარად აფასებს. დამატებით ნაკადებში შედის შემოსავლები 2018 წლის ფილმიდან Bohemian Rhapsody, ასევე ატრიბუტიკა და სხვა ლიცენზიები.
წყაროთა ინფორმაციით, ბენდის წევრებს – ბრაიან მეის, როჯერ ტეილორსა და ჯონ დიკონს, ასევე ფრედი მერკურის სამართალმემკვიდრეებს საკუთარი ადვოკატები ჰყავთ და ისინი მოლაპარაკებების პროცესში კოლექტიურად არიან ჩართულნი. მათ Billboard-თან კომენტარის გაკეთება არ ისურვეს.
Queen-ის კატალოგი მოიცავს ისეთ საკულტო ჰიტებს, როგორებიცაა Bohemian Rhapsody, Killer Queen, Another One Bites the Dust, Radio Ga Ga, Somebody to Love, Crazy Little Thing Called Love, You’re My Best Friend, We Will Rock You და We Are the Champions. 1991 წლიდან კატალოგს 38 მილიონი ალბომის ეკვივალენტური გაყიდვა ჰქონდა აშშ-ში. მსოფლიო მასშტაბით კი – 41 მილიონი.
2018 წლიდან, ფილმ Bohemian Rhapsody-ს გამოსვლის შემდეგ, Queen-ის გაყიდვები და სტრიმინგი 45.5%-ით გაიზარდა. წყაროები ამბობენ, რომ ჯგუფის წლიური ჰონორარი დაახლოებით 50 მილიონი დოლარია.
Queen-ის გასაყიდი შეთავაზების ღირებულება გამოთვლებით დაახლოებით 1 მილიარდი დოლარი გამოდის. მაგრამ ჯგუფის წევრები კიდევ უფრო მეტს – 1.2 მილიარდ დოლარს ითხოვენ. შესაძლოა სწორედ ეს იყოს მიზეზი იმისა, რომ კატალოგი ამდენი ხნის განმავლობაში მოლოდინის რეჟიმშია. თუმცა თუ წყაროთა ინფორმაცია გამართლდა, საქმე შესაძლოა მალე დაიხუროს.
