2023 წელს კაროლ ჯიმ Billboard-ს თავისი ოცნება გაუზიარა: „თუ შემეკითხებით: კაროლ, რა არის შენი ოცნება? გეტყვით: რომ ჩემი სახელი მსოფლიომ იცოდეს. ეს საოცარი იქნებოდა.” შეიძლება ითქვას, რომ დღეს მას ეს ოცნება აუხდა.
კაროლ ჯის ცხოვრებაში 6 მარტი ერთ-ერთი ყველაზე მნიშვნელოვანი დღეა: 2024 წლის Billboard Women In Music დაჯილდოებაზე კოლუმბიელი ვარსკვლავი მთავარი ტიტულის, „წლის ქალის” მფლობელი გახდა. ის ესპანურ ენაზე მომღერალი პირველი ქალია, ვისაც ჯილდოს არსებობის ისტორიაში აღნიშნული წოდება ერგო.
კაროლ ჯი Billboard Hot 100-ში 30-ჯერ არის შესული, მათ შორისაა ტოპ ათეულში გასული სიმღერა TQG, რომელსაც ის შაკირასთან ერთად ასრულებს. Რაც შეეხება ლათინური სიმღერების ჩარტს, აქ მას რეკორდული 63 სიმღერა აქვს, რომელთაგანაც 26 ტოპ ათეულში, ხოლო 8 პირველ ადგილზე მოხვდა. ლათინურ ჩარტში პირველი ადგილზე გასული სიმღერების რაოდენობით კაროლ ჯი მესამე ადგილს იკავებს გლორია ესტეფანისა (15 სიმღერა) და შაკირას (13 სიმღერა) შემდეგ.
„უზარმაზარი ტალანტის დამსახურებით, კაროლ ჯიმ მთელი მსოფლიოს მასშტაბით შექმნა მოძრაობა ქალებისთვის მათი გამაძლიერებელი ტექსტებითა და შთამაგონებელი თავდაჯერებულობით,” – თქვა ბილბორდის სარედაქციო დირექტორმა ჰანა კარპმა კაროლ ჯის წარდგენისას.
„კაროლ ჯი გახდა მსოფლიო სუპერვარსკვლავი, რომელიც ესპანურად მღერის,”- დაამატა, ბილბორდის ლათინურ/ესპანური კონტენტის მენეჯერმა ლეილა კობომ. „ეს კი გვაჩვენებს, რომ მუსიკა და არტისტიზმი არც ენით და არც საზღვრებით არ იზღუდება. Billboard-ი კი კარგად აცნობიერებს ამ ფაქტს. ეს ნამდვილად ისტორიული მომენტია როგორც ჩვენი ბრენდისთვის, ასევე ლათინური მუსიკისთვის.”
