ქართველი მუსიკოსის, ბაჩა მძინარაშვილის კონცერტები ნიუ-იორკისა და ლონდონის ცნობილ ჯაზკლუბებში გაიმართება

ბაჩა მძინარაშვილი ქართველი პიანისტი და კომპოზიტორია, რომელიც ამჟამად ნიუ-იორკში ცხოვრობს. ამერიკაში 2009 წელს ბერკლის მუსიკალურ კოლეჯში სასწავლებლად ჩავიდა. კოლეჯის დასრულების შემდეგ კი პროფესიული საქმიანობა ნიუ-იორკში განაგრძო. 

მაისში ქართველი მუსიკოსის კონცერტები ლონდონისა და ნიუ-იორკის ცნობილ ჯაზკლუბებში გაიმართება. დაგეგმილ კონცერტებზე და საკუთარ შემოქმედებაზე ბაჩა მძინარაშვილი Billboard საქართველოს ესაუბრა:

„ბერკლის კოლეჯში სწავლის პერიოდში ჩამოვაყალიბე ბენდი, რომელთან ერთადაც მონაწილეობა მივიღე არაერთ ცნობილ ჯაზფესტივალში. ასევე გავმართეთ კონცერტები ისეთ დარბაზებში, როგორებიცაა Jazz at Lincoln Center და Rose Theater. კოლეჯის დასრულების შემდეგ კი მალევე ჩავწერე ჩემი სადებიუტო ალბომი Smile, რომელშიც ჩემთან ერთად ბერკლის პროფესორები და ჩემი თანაკურსელები უკრავენ.

ამჟამად დაგეგმილი მაქვს ორი ძალიან მნიშვნელოვანი კონცერტი მაისში: ნიუ-იორკის Birdland Jazz Club-სა და ლონდონის ლეგენდარულ Ronnie Scott’s-ში. ამ ორ კლუბთან განსაკუთრებული დამოკიდებულება მაქვს. Birdland ჩარლი პარკერის სახელობის კლუბია. ჩარლი პარკერი, მოგეხსენებათ, Bebop-ის შემქმნელია და მისი ფრაზები და ჰარმონია ჩემში ძალიან დიდ გრძნობებს აღძრავს. Ronnie Scott’s რაც შეეხება, მახსოვს, პირველად რომ ვუყურე  ჩეტ ბეიკერის ლაივს, საოცარი ემოციები დამეუფლა. ეს მისი ერთ-ერთი საუკეთესო კონცერტი იყო, რაც კი ოდესმე მინახავს. ეს კონცერტი კი 1986 წელს სწორედ Ronnie Scott’s Jazz Club-შია ჩაწერილი. ასე რომ, ორივე ადგილი ძალიან მიყვარს. 

კონცერტებში მონაწილეობას მიიღებენ ცნობილი საქსოფონისტი მაირონ უოლდენი და ჩემი მენტორი, გრემის მფლობელი მესაყვირე დარენ ბარეტი. ეს მუსიკოსები ძალიან მნიშვნელოვანი ადამიანები არიან ჩემს ცხოვრებაში. მათთან დაკვრით უამრავ რამეს ვსწავლობ. მინდა, მადლობა გადავუხადო ყველა იმ ადამიანსა თუ კომპანიას, რომლებიც მხარში დამიდგნენ ამ იდეის განხორციელებაში.

რაც შეეხება Სამომავლო გეგმებს, ბევრი სხვადასხვა აქტივობა მაქვს ჩაფიქრებული. ერთ-ერთი ყველაზე მნიშვნელოვანი, რისი თქმაც შემიძლია, ის არის, რომ ვაპირებ ჯაზაკადემიის გახსნას ნიუ-იორკში. გვინდა, რომ მსოფლიოს წამყვანი პედაგოგების მოწვევითა და ჩვენ მიერ შემუშავებული პროგრამებით ახალგაზრდა მუსიკოსებს კარიერულ ზრდასა და განვითარებაში დავეხმაროთ. ჩვენი მიზანია, რომ აქ სწავლა ქართველმა ახალგაზრდებმაც შეძლონ.”