„ჯადოსნური ეკრანი – ამბები ქართული ანიმაციიდან” 

3 და 4 აპრილს რუსთაველის ეროვნული თეატრის სცენა პროექტს „ჯადოსნური ეკრანი – ამბები ქართული ანიმაციიდან” უმსპინძლებს.

პროექტი თითქმის საუკუნოვანი ისტორიის მქონე ქართული ანიმაციის შედევრებს აერთიანებს. მის ფარგლებში ბავშვებს შესაძლებლობა მიეცემათ, ძველი ქართული ანიმაციები ახლებური, გაფერადებული ვერსიით იხილონ. ეს კი ხელს შეუწყობს ქართული მულტფილმების პოპულარიზებას იმ მუსიკასთან ერთად, რომელსაც დიდი კომპოზიტორები სპეციალურად ანიმაციური ფილმებისთვის ქმნიდნენ. ესენი იყვნენ გია ყანჩელი, ჯანსუღ კახიძე, მერი დავითაშვილი, ალექსანდრე ბასილაია, ნუნუ გაბუნია და სხვები.

სასცენო წარმოდგენას ერთგვარი მიუზიკლის ფორმა ექნება, სადაც ყველა თაობის საყვარელი ქართველი მომღერლები ქართული ანიმაციური ფილმებიდან უკვდავ სიმღერებს შეასრულებენ. წარმოდგენაში მონაწილეობას მიიღებენ: ნუკრი კაპანაძე, ნეკა სებისკვერაძე, ლიზა ბაგრატიონი თეატრალურის კვარტეტი, დათო ნოზაძე, მანანა თოდაძე, ეკა მამალაძე, გიორგი სუხიტაშვილი და ვოკალის აკადემიის კვარტეტი – 4. საღამოს მუსიკალურ თანხლებას გაუწევს ბენდი მაესტრო ნიკა ნიკვაშვილის ხელმძღვანელობით. მუსიკალური ნომრები, ქორეოგრაფიული დადგმებითა და რეჟისორ ნიკა საბაშვილის საინტერესო გადაწყვეტით, მაყურებელს ქართულ ანიმაციაში ამოგზაურებს. 

საღამოს წამყვანი ნიკოლოზ წულუკიძე იქნება. საინტერესო ისტორიებითა და ეპოქის ანალიზით, ის ბავშვებს ხელახლა შესთავაზებს ძველ ქართულ ანიმაციებს, რომლებიც აქამდე, მათი ფერებისა და ფირების ხარისხის გამო, თანამედროვე ბავშვებისთვის არცთუ ისე მიმზიდველი იყო. „ჯადოსნური ეკრანი” კი ბავშვების ქართულ მულტფილმებთან ხელახლა ზიარების მცდელობა იქნება – ამჯერად განახლებული, ფერადი ვიზუალითა და თანამედროვე ხარისხით.