ნიკ კეივი და უორენ ელისი უკვე ოცდაათ წელზე მეტია, რაც მუსიკას ერთად ქმნიან. ჯგუფ Bad Seeds-ში ხანგრძლივი თანამშრომლობის გარდა, მუსიკოსებს ათობით ფილმის საუნდტრეკი აქვთ დაწერილი, რომელთა რიცხვს ემი უაინჰაუსზე გადაღებული ფილმი Back to Black შეემატა.
11 აპრილს მუსიკოსებმა უაინჰაუსისადმი მიძღვნილი სიმღერა, Song for Amy გამოაქვეყნეს. ჯამში მათ მიერ ფილმისთვის შექმნილი საუნდტრეკი 12 კომპოზიციისგან შედგება. მათ შორის 10 ინსტრუმენტული თემაა, ერთი – Song for Amy და ერთიც ამავე სიმღერის ინსტრუმენტული რეპრიზი.
„ნიკი და უორენი ჩემს გონებაში ერთადერთ მუსიკოსები იყვნენ, რომლებსაც ფილმის მუსიკალური გაფორმება შეეძლოთ,” – თქვა Back to Black-ის რეჟისორმა სემ ტეილორ-ჯონსონმა. „წლების განმავლობაში ყველაფერს ვუსმენდი, რასაც კი წერდნენ და სულ მინდოდა, მათთან ერთად მუშაობის ოცნება ამეხდინა. მათმა მგრძნობიარობამ და ამბის საფუძვლიანად გაგებამ ფილმისთვის ღრმა და ემოციური მუსიკა მოგვცა.”
Back to Black: Songs From the Original Motion Picture ალბომის სახით 17 მაისს გამოვა – აშშ-ში ფილმის პრემიერის დღეს. ნიკ კეივისა და უორენ ელისის Song For Amy-ს გარდა, მასში შედის ტონი ბენეტის, ბილი ჰოლიდეის, უილი ნელსონის და სხვათა სიმღერები და, რა თქმა უნდა, თავად ემი უაინჰაუსის ჰიტები.
მოუსმინეთ სიმღერას Song For Amy:
