28 ივლისს Black Sea Arena-ზე ლეგენდარული ბრიტანული ჯგუფი Massive Attack კონცერტს გამართავს. პირველად საქართველოში მსმენელს შესაძლებლობა ექნება, მოუსმინოს ჯგუფის ისეთი კომპოზიციების განახლებულ ვერსიებს, როგორიც არის Teardrop, Unfinished Sympathy და Paradise Circus. Massive Attack-ის კონცერტებს ხშირად აუდიო-ვიზუალური თეატრალური პერფორმანსების სახე აქვს, რამდენადაც ბენდი ყოველთვის ცდილობს, შემოქმედება რეალური და ყოველდღიური ცხოვრების დეტალებს დაუკავშიროს.
Massive Attack ცნობილია ჰიპ-ჰოპის, ელექტრონიკის, დაბის და სხვა მუსიკალური ჟანრების სინთეზის უნარით. მათი შემოქმედება მუსიკაში ყოველგვარ საზღვრებს არღვევს. სწორედ ამიტომ, ბრისტოლში დაფუძნებულმა ბენდმა ინოვაციური მუსიკით მთელს მსოფლიოში მიმდევრები მალევე მოიპოვა. Massive Attack-ს ერთგული გულშემატკივრების დიდი არმია მსოფლიო მასშტაბით ჰყავს, მათ შორის საქართველოში.
ბილეთების გაყიდვა 25 აპრილს, TKT.ge-ზე იწყება. კარი 18:00-ზე გაიღება, ხოლო კონცერტი 21:00-ზე დაიწყება.
