11 მაისს ევროვიზიის რიგით 68-ე კონკურისს გამარჯვებული გამოვლინდა. გამარჯვებულის ტიტული შვეიცარიის მონაწილემ მოიპოვა. არტისტმა, სასცენო სახელით – Nemo, კონკურსის სცენაზე სიმღერა – The Code შეასრულა. შვეიცარიამ პირველად ევროვიზიის სიმღერის კონკურსი 1956 წელს მოიგო. მეორე გამარჯვებული კი 1988 წელს სელინ დიონი გახდა.
ქულების გამოცხადებისას პირველი ადგილისათვის ორი ქვეყანა – შვეიცარია და ხორვატია იბრძოდნენ, თუმცა ჟიურის და მაყურებლის ხმებმა შვეიცარიის გამარჯვება განსაზღვრა.
Nemo საკუთარ თავს არა-ბინარულ არტისტად წარადგენს. ის შვეიცარიის სცენაზე 2015 წლიდან გამოჩნდა. მუსიკოსს ჯილდო 2023 წლის ევროვიზიის გამარჯვებულმა შვედმა მუსიკოსმა Loreen-მა გადასცა.
ევროვიზიის წლევანდელი კონკურსი ბევრი დრამატული მოვლებით იყო დატვირთული. ამ წელს ნიდერლანდების წარმომადგენელს კულისებში მომხდარი ინციდენტის გამო დისკვალიფიკაცია მისცეს. ფინალის დღეს კი ნორვეგიის მიერ ჟიურის გამომცხადებლად დანიშნულმა ალანნა მელემ თავისი სიტყვა დაასრულა ფრაზით – “თავისუფლება პალესტინას”. საფრანგეთის წარმომადგენელმა ფინალის დღეს რეპეტიცია შეაჩერა, რათა აუდიტორიისათვის მშვიდობის და სიყვარულის გზავნილი გადაეცა. ირლანდიის წარმომადგენელმა ისრაელის კომენტატორის რეპლიკების გამო, ევროპის საზოგადოებრივი მაუწყებლების გაერთიანების მიმართ პროტესტი გამოხატა და ამის ნიშნად ერთ-ერთი რეპეტიცია გამოტოვა.
Nemo-ს გამარჯვება ნიშნავს იმას, რომ ევროვიზია 2025 წელს შვეიცარიაში ჩატარდება.
