15 მაისს „გუგლმა” ტრადიციული ყოველწლიური კონფერენცია გამართა. როგორც მოსალოდნელი იყო, კომპანიამ ხელოვნური ინტელექტის პროდუქტების დიდი ჯგუფი წარადგინა, რომლებიც, როგორც „გუგლი” მიიჩნევს, სრულიად შეცვლის კომპანიის იმ სახეს, რომელსაც დღეს ვიცნობთ.
„გუგლის” ბლოგზე მისმა აღმასრულებელმა დირექტორმა სანდარ პიჩაიმ ახსნა, თუ როგორ გახდა 2023 წლის Gemini AI საძიებო სისტემის გიგანტის ახალი ეპოქის დასაწყისი. „ერთი წლის წინ ჩვენ წარვადგინეთ ჩვენი გეგმები Gemini-სთან დაკავშირებით. ეს უდიდესი ნაბიჯია იმისთვის, რომ ნებისმიერი „ინფუთი” ნებისმიერ „აუთფუთად” ვაქციოთ. ეს არის I/O (input/output) ახალი თაობისთვის.”
ახალი თაობის ეპოქის წარსადგენად „გუგლმა” სარეკლამო რგოლი შექმნა, რომელშიც ჯეი-ზის ერთ-ერთი ყველაზე პოპულარული სიმღერა – 2003 წლის Public Service Announcement (Interlude) გამოიყენა მუსიკოსის მერვე სტუდიური ალბომიდან The Black Album. Სარეკლამო რგოლს Welcome to the Gemini Era ჰქვია და მისი პრემიერა „იუთუბზე” შედგა. კლიპში წარმოდგენილია ყველა ის ახალი პროდუქტი და ფუნქციონალი, რომელსაც ხელოვნური ინტელექტი მომხმარებელს შესთავაზებს.
Gemini-ს შესაძლებლობების გარდა, ყველაზე საინტერესო ნაწილი იყო Veo-ს, „გუგლის” DeepMind-ის გენერაციული ვიდეომოდელის წარდგენაც. „გუგლის” DeepMind-ის კვლევის სპეციალისტის თქმით, Veo გაწვრთნილია, რომ მიწოდებული ტექსტი ვიდეოდ გარდაქმნას.
ნახეთ სრული პრეზენტაცია
