17 მაისს ბილი აილიშის ახალი ალბომი სახელწოდებით Hit Me Hard and Soft ოფიციალურად გამოიცა და სტრიმინგ სერვისებზე განთავსდა. ალბომის პროდიუსერი ტრადიციისამებრ პოპ მუსიკოსის ძმა, ფინიას აილიშია. Hit Me Hard and Soft ბილი აილიშის მესამე სტუდიური ჩანაწერია და 10 ტრეკს აერთიანებს. არტისტმა სადებიუტო LP – When We All Fall Asleep, Where Do We Go? 2019 წელს გამოსცა, 2021 წელს კი მეორე ალბომი – Happier Than Ever წარადგინა. ორივე ნამუშევარი Billboard 200-ის ჩარტის ლიდერი გახდა და პირველ ადგილს კვირაზე მეტხანს იკაცებდა. ახალი ალბომის გამოსვლამდე ბილი აილიშს ცალკეული სინგლები არ გაუვრცელებია. როგორც 22 წლის მომღერალმა თავის ფანებს აუწყა, მას სურდა, ყველა ნამუშევარი ერთდროულად მიეტანა მსმენელამდე.
17 მაისიდან აილიშის გულშემატკივრებს მთლიანი ალბომის მოსმენის შესაძლებლობა აქვთ. ოფიციალურ გამოცემამდე ალბომის მოსმენის საპრეზენტაციო წვეულებები ნიუ-იორკსა და ლოს-ანჯელესში გაიმართა. სიმღერები ეხება ისეთ თემებს, როგორიც არის: ურთიერთობის საწყისი ეტაპები და დაშორების მტკივნეული შედეგები, სექსუალობისა და იდენტობის პოვნა, საკუთარი თავის რწმენა, ცხოვრებისეული ნავიგაცია ყურადღების ცენტრში ყოფნის კვალდაკვალ. Hit Me Hard and Soft ბილი აილიშის ყველაზე მრავალფეროვანი და მოწიფული ალბომია. ამავდროულად, სავარაუდოა, რომ ეს ალბომი მისი ადრეული შემოქმედებითი ეპოქის თაყვანისმცემლებსაც მოეწონებათ. ამ ვარაუდს განაპირობებს ბილი აილიშის ინტერვიუ Rolling Stone-თან, რომელშიც მან აღნიშნა, რომ ალბომს თავის ენიგმატურ, ლურჯთმიან თინეიჯერობასთან დაბრუნებად აღიქვამს.
„მთელი [შემოქმედებითი] პროცესის განმავლობაში ვგრძნობდი, რომ ვუბრუნდებოდი იმ გოგოს, რომელიც ადრე ვიყავი,” – ამბობს არტისტი. „ყველაფერში მას ვეძებდი. თითქოს ის მსოფლიომ და მედიამ დაახრჩო. არ მახსოვს ის მომენტი, როცა წავიდა.”
მოუსმინეთ ბილი აილიშის ახალ ალბომს – Hit Me Hard and Soft.
