Billboard Latin Women in Music-ის დაჯილდოებაზე Global Impact Award-ის მფლობელმა კამილა კაბეიომ ის ქალები გამოყო, რომელთაც მის ცხოვრებასა და კარიერაზე დიდი გავლენა იქონიეს.
ინგლისურ და ესპანურ ენებზე კაბეიომ ემოციურად ისაუბრა დედაზე, რომელიც ცერემონიას ესწრებოდა. „ვფიქრობდი, რა მეთქვა დღეს აქ, თქვენ წინაშე,და გადავწყვიტე, ეს მომენტი დედისთვის მადლობის სათქმელად გამომეყენებინა. გულწრფელად რომ ვთქვა, მასზე ასე არასდროს მისაუბრია და მინდა, ეს დღეს გავაკეთო.”
ამის შემდეგ კაბეიომ ისაუბრა დედის ძალასა და უნარზე, რომლითაც რთულ პერიოდებში მის გამხნევებას ახერხებს. „როცა მთელ მსოფლიოში პრობლემებია და ახალი ამბების სათაურები ომზე და სიკვდილზე გულს მიკლავს, დედაჩემი მახსენებს, რომ ამ სამყაროში არსებობს სიყვარულიც. ის თავისი უსასრულო ძალით შთამაგონებს და უშრეტ ენერგიას გადმოგვცემს მე და ჩემს დას, არ აქვს მნიშვნელობა, თუ რამდენად დაღლილია თავად. ის მაჩვენებს, რომ ამ სამყაროში არსებობს იმედი. მისი საუკეთესო რჩევა კი არის არა ის, რასაც ამბობს, არამედ ის, რასაც თავად აკეთებს: სიკეთე, ემპათია და ყველაზე მნიშვნელოვანი – ის, თუ როგორ ექცევა ადამიანებს.”
სამადლობელ სიტყვაში კაბეიომ ასევე ახსენა ღონისძიებაზე დაჯილდოებული სხვა ქალებიც და მათ შორის რამდენჯერმე გამოყო გლორია ესტეფანი. „ძალიან დიდი პატივია ჩემთვის ამ ჯილდოს ამ ადამიანებთან ერთად გაზიარება. გლორია ესტეფანი… ხომ არ ხუმრობთ? კეროლ ჯი, ანა ბარბრა, კენი გარსია, ლა ინდია, კალი უჩისი. მიყვარხართ ყველა, თქვენ გასაოცრები ხართ. თქვენ ყველანი ჩემი და სხვა ქალების შთაგონების წყარო ხართ. ყველას გესალმებით. გლორია, მიყვარხარ!”
მომღერალმა ასევე მადლობა გადაუხადა თაყვანისმცემლებს და მათ ერთი რჩევაც მისცა: „მინდა, მათ ვუთხრა, რომ არ დააკნინონ თავიანთი ქმედებების ძალა, იყვნენ კეთილგანწყობილი სკოლაში გადმოსული ახალი მორცხვი ბავშვის მიმართ, დაუდგნენ გვერდით მეგობარს, რომელიც იჩაგრება და ჩაერთონ იმ საკითხში, რაზეც ღელავენ. სიკეთის ყველა აქტი ჯაჭვურ რეაქციას იწვევს.”
„ყოველდღე მადლობელი ვარ იმისთვის, რომ ვარ კუბელი და მექსიკელი მაიამიდან. ვამაყობ, რომ წარმოვადგენ ახალგაზრდა ადამიანებს ისეთივე ისტორიებით, როგორიც ჩემია და რომ ვამტკიცებ შესაძლებლობებს. დღეს მე აქ ვარ, ბევრი ადამიანის სიკეთისა და გულისხმიერების გამო და ყოველდღე ვახსენებ ჩემს თავს, რომ ეს ყველაფერი სხვას უნდა გადავცე. მიყვარხარ, დედა და მიყვარხართ ყველა. მიყვარხარ, გლორია ესტეფან.”
ნახეთ კამილა კაბეიოს სიტყვით გამოსვლა:
