18 ივნისს ტორონტოს საერთაშორისო კინოფესტივალმა ელტონ ჯონზე გადაღებული დოკუმენტური ფილმის პრემიერა დააანონსა. Never Too Late-ის მსოფლიო პრემიერა TIFF-ზე სექტემბერში შედგება და მისი რეჟისორი მუსიკოსის პარტნიორი დევიდ ფერნიშია.
IMDb-ის ინფორმაციის თანახმად, ელტონ ჯონის ახალ დოკუმენტურ ფილმში ნაჩვენები იქნება ბოლო 50 წლის განმავლობაში გამართული ისეთი კონცერტების კადრები რომლებიც მაყურებელს აქამდე არ უნახავს, ასევე ხელნაწერი ჟურნალები და მისი ოჯახის წევრების დოკუმენტური კადრები. გამოცემა Deadline-ის თქმით კი, დოკუმენტური ფილმი ძირითადად ელტონ ჯონის გამოსამშვიდობებელი ტურნეს, Farewell Yellow Brick Road tour-ის შესახებ იქნება.
ელტონ ჯონის Farewell Yellow Brick Road ტურნე ბევრად მეტი იყო, ვიდრე უბრალოდ მისი ბოლო ტურნე და მუსიკალური კარიერის დასრულება. უკვე 2023 წლის ივლისში Farewell Yellow Brick Road ტურნეს შემოსავალი 900 მილიონიდოლარს გადასცდა და ამით ისტორიაში ყველაზე შემოსავლიანი ტურნეს სახელით შევიდა.
ბოლო დროს ელტონ ჯონის ძალისხმევა საქველმოქმედო ფონდებისკენ იყო მიმართული. შიდსის ფონდთან ერთად მუსიკოსმა ორგანიზაციის გამოწვევა სახელწოდებით Speak Up Sing Out გამოაცხადა და გულშემატკივრებს სთხოვა, მისი კლასიკური ჰიტის Your Song-ის ფრაგმენტი შეესრულებინათ. გამარჯვებულს კი ელტონ ჯონთან პირისპირ შეხვედრის შესაძლებლობა მიეცემა.
