ივნისში რიანამ Fenty Beauty-ის ახალი ხაზი – Fenty Hair წარადგინა. ამ სიახლიდან მალევე კი ცნობილი გახდა, რომ ვარსკვლავი Dior-ის კლასიკად ქცეული სუნამოს, J’Adore-ის ახალი სახეა.
„სურნელი, რომელიც ჩემთვის კარგად არის ნაცნობი და დიდი ხანია მიყვარს, ქალებისათვის ძალიან ბევრს ნიშნავს. მოუთმენლად ველი, როდის შევუერთდები ამ თავგადასავალს,” – აღნიშნა რიანამ მოდის ჟურნალ Women’s Wear Daily-ისთან საუბრისას. როგორც რიანა განმარტავს, ის სუნამოს საკუთარი სამყაროს, ისტორიის, კრეატიულობისა და ქალურობის საშუალებით წარუდგენს საზოგადოებს.
ახალი თანამშრომლობის დასაანონსებლად Dior-მა ინსტაგრამზე რიანას ფოტო გამოაქვეყნა. როგორც აღწერაში ვკითხულობთ, Dior-ისთვის რიანასთან თანამშრომლობა განსაკუთრებით სასიხარულოა. Dior-ის პოსტში რიანა მოხსენიებულია, როგორც საკულტო პერსონა, რომელიც მრავალმხრივი ნიჭითა და სილამაზით არის დაჯილდოებული.
თანამშრომლობის შესახებ პოსტს ვხედავთ რიანას ინსტაგრამის ანგარიშზეც. „საიდუმლო გამჟღავნდა,” – ვკითხულობთ პოსტის აღწერაში.
რიანას J’Adore-ის კამპანიაში 1-ელ სექტემბერს ვიხილავთ. ფოტოები მოდის ცნობილმა ფოტოგრაფმა, სტივენ კლაინმა გადაიღო.
რიანას Dior-ის მოდის სახლთან დიდი ხნის ურთიერთობა აკავშირებს. ვარსკვლავი 2024 წლის პარიზის მოდის კვირეულზე ბრენდის ჩვენებაზე სპეციალურ სტუმრებს შორის იყო. 2015 წელს კი მომღერალი Dior-ის პირველი შავკანიანი ელჩი გახდა.
„რიანას J’Adore-ის ახალ სახედ არჩევა ჩვენთვის სრულიად გასაგებია. ის არა მხოლოდ ყველა დროის ერთ-ერთი უდიდესი არტისტია, არამედ მრავალმხრივ ნიჭერი, წარმატებული ბიზნესის მფლობელი, ადამიანის უფლებების დამცველი, ორი შვილის დედა და უნიკალური სილამაზით დაჯილდოებული ადამიანია”- განაცხადა Parfums Christian Dior-ის ხელმძღვანელმა ვერონიკ კორტუამ.
