პოლ მაკარტნის 18 ივნისს 82 წელი შეუსრულდა. ამ დღის აღსანიშნავად The Beatles-ის ვარსკვლავმა ინსტაგრამზე ფოტო გამოაქვეყნა. „ამბობენ, რომ დღეს ჩემი დაბადების დღეა,” – ვკითხულობთ მუსიკოსის პოსტის აღწერაში.
წინა ღამით მსახიობმა ოსტინ ბატლერმა გაამხილა, რომ ის მაკარტნის სახლში სადღესასწაულო წვეულებას დაესწრო. ამავე წვეულებაზე სტუმრებს შორის იყვნენ რინგო სტარი, მიკ ჯაგერი, ბრიუს სპრინგსტინი, მერილ სტრიპი, ტეილორ სვიფტი. „სიგიჟე იყო,” – აღნიშნა ბატლერმა ჯიმი კიმელის შოუში სტუმრობისას. „ეს ყველაზე გიჟური წვეულება იყო, რაზეც კი მთელი ჩემი ცხოვრების განმავლობაში ვყოფილვარ.”
თავის იუბილემდე ოთხი დღით ადრე მაკარტნიმ და მისმა ბენდმა Wings ცოცხალი ჩანაწერების ახალი ალბომი, One Hand Clapping გამოსცეს. ვარსკვლავმა ასევე ცოტა ხნის წინ ბრუკლინის მუზეუმში ფოტო გამოფენა მოაწყო, სახელწოდებით Eyes of the Storm. ექსპოზიციამ ადრეული წლების კადრები გააერთიანა, რომელზეც ის და The Beatles-ის წევრები, ჯორჯ ჰარისონი და ჯონ ლენონი არიან აღბეჭდილი.
2023 წლის ნოემბერში პოლ მაკარტნიმ წარადგინა Beatles-ის გამოუქვეყნებელი სიმღერა – Now and Then, რომელიც ძველი აუდიო ჩანაწერიდან აღადგინეს. არტისტი აუდიო სპეციალისტებთან ერთად მუშაობდა, რათა ჯონ ლენონის ჩანაწერები მაღალი ხარისხით აღედგინათ. ეს პროცესი ხელოვნური ინტელექტის გამოყენებით მიმდინარეობდა, რასაც მაკარტნიმ „ჯადოსნური” უწოდა.
„როდესაც სტუდიაში ვიყავით, ჯონის ხმა ჩვენს ყურებში ისმოდა,” – თქვა მუსიკოსმა BBC Radio 1-თან გასულ წელს ჩაწერილ ინტერვიუში. „წარმოიდგინეთ, ის თითქოს ჩვენ გვერდით ოთახში, ხმის ჩამწერ ჯიხურში იყო და ისევ ერთად ვმუშაობდით…ჩემთვის განსაკუთრებული იყო კვლავ ჯონთან ერთად სიმღერა,” – აღნიშნა პოლ მაკარტნიმ.
იხილეთ პოლ მაკარტნის პოსტი, რომლითაც ის თავის იუბილეს გამოეხმაურა:
