კევინ კოსტნერი მისა და მომღერალ Jewel-ის რომანზე არსებულ ჭორებს გამოეხმაურა. ჰოვარდ სტერნის შოუში მსახიობმა მისი ახალი ფილმის, Horizon: An American Saga-ს შესახებ ისაუბრა და გავრცელებულ ჭორებზე დუმილიც დაარღვია.
„Jewel და მე მეგობრები ვართ. ჩვენ არასდროს გვქონია სხვა ტიპის ურთიერთობა. ის განსაკუთრებულია და არ მინდა, რომ ამ ჭორებმა ჩვენი მეგობრობა გააფუჭოს,” – თქვა კოსტნერმა.
69 წლის მსახიობი და 50 წლის მომღერალი ერთმანეთს რიჩარდ ბრენსონის კერძო წვეულებაზე შეხვდნენ. „თვითმფრინავში ცხრა ადამიანთან ერთად ვიყავი და მათ შორის ერთ-ერთი Jewel იყო. მასთან არაჩვეულებრივი საუბარი მქონდა.”
ამის Შემდეგ თემამ უიტნი ჰიუსტონზე გადაინაცვლა, რომელიც კევინ კოსტნერს პარტნიორობას უწევდა ცნობილ ფილმში „პირადი მცველი”, რომლის საუნდტრეკიც მომღერლის ყველაზე დიდ ჰიტად იქცა.
„ეს შეიძლებოდა ყოფილიყო მიშელ პფაიფერი, შეიძლებოდა ყოფილიყო ჯულია რობერტსი,” – თქვა კოსტნერმა, „მაგრამ როცა შევხედე, ვთქვი: „არა, ეს უნდა იყოს უიტნი ჰიუსტონი. ის ყველაზე ლამაზი გოგოა. ისაა ერთადერთი, ვისაც შეუძლია, იმღეროს…”
მსახიობის თქმით, ჰიუსტონი, რომელიც 2012 წელს 48 წლის ასაკში გარდაიცვალა, თავიდან გადასაღებ მოედანზე თავს არაკომფორტულად გრძნობდა.
„მან არ იცოდა, როგორ შეექმნა პერსონაჟი. მე ვუთხარი: „თუ რაღაცები ბუნდოვანი იქნება, უბრალოდ შემომხედე და მითხარი, მე ყველაფერს დავალაგებ.”
კოსტნერის იდეა იყო ისიც, რომ ფილმში ჰიუსტონს დოლი პარტონის I Will Always Love You-ს ა კაპელა შეესრულებინა. „თუ მას უნდა ემღერა სიმღერა ისე, რომ რეალურად ეჩვენებინა, რომ მართლა ვუყვარდი, ეს ყოველგვარი მუსიკის გარეშე უნდა გაეკეთებინა და ამით დაამტკიცებდა, თუ რამდენად გამბედავი იყო,” – ამბობს მსახიობი.
კოსტნერმა დაადასტურა, რომ „პირადი მცველის” გაგრძელების გადაღებასაც გეგმავდა, რომელშიც პრიცესა დაიანას უნდა ეთამაშა. „ამ ფილმის გადაღება ვეღარ შევძელი, რადგან პრინცესა დაიანა ვერ ჩავანაცვლე,” – თქვა მსახიობმა. კითხვაზე კი, იყო თუ არა სცენარში კოცნის სცენა, კოსტნერმა უპასუხა: „მის შემთხვევაში რომანის შექმნას არ ვაპირებდი, მაგრამ რაღაც მომენტი იქნებოდა.”
