სელინ დიონმა ცრემლები ვერ შეიკავა, როცა მაყურებელი მას ფეხზე წამოდგომით შეეგება დოკუმენტური ფილმის ჩვენებაზე, სახელწოდებით I Am: Celine Dion.
„ყველას მადლობას გიხდით იმისთვის, რომ ჩემი მოგზაურობის ნაწილი ხართ. ეს ფილმი ჩემი სასიყვარულო წერილია ყველა თქვენგანისთვის. იმედი მაქვს, რომ ძალიან მალე ისევ შევხვდებით,” – მიმართა აუდიტორიას მომღერალმა.
ოსკარზე ნომინირებული რეჟისორის, ირენ ტეილორის მიერ გადაღებული დოკუმენტური ფილმი პირდაპირ და გულწრფელად აჩვენებს ვარსკვლავის ბრძოლას გაშეშებული ადამიანის სინდრომთან (Stiff Person Syndrome). პრესრელიზის მიხედვით, „ფილმში ასევე წარმოდგენილია ის მუსიკა, რომელიც დიონის ცხოვრებას მიუძღოდა და ის ასახავს ადამიანის სულის შეუპოვრობას.”
2022 წლის დეკემბრიდან მომღერალი საჯაროდ სულ უფრო იშვიათად ჩნდება, რისი მიზეზიც სწორედ მისი დიაგნოზია. ეს არის იშვიათი ნევროლოგიური დაავადება, რომელიც კუნთების უკონტროლო სპაზმს იწვევს, რის გამოც პაციენტს გადაადგილება უჭირს. შედეგად, დიონი იძულებული გახდა, 2023 წელს დაგეგმილი კონცერტების თარიღები გადაედო, საბოლოოდ კი ტურნე სრულიად გააუქმა.
2024 წლის გრემის დაჯილდოებაზე სელინ დიონმა საღამოს ბოლო ჯილდო წარადგინა – წლის ალბომი, რომელიც ტეილორ სვიფტის Midnights-ს ხვდა წილად. თავად დიონმა ეს კატეგორია 27 წლის წინ ალბომით Falling Into You მოიგო.
მარტში კი გაშეშებული ადამიანის სინდრომის დღეზე მომღერალმა სოციალურ ქსელში განცხადება გაავრცელა: „როგორც უმეტესობამ უკვე იცით, 2022 წლის შემოდგომაზე დამისვეს ეს დიაგნოზი. ამ ავტოიმუნური დაავადების დაძლევა ჩემი ცხოვრების ყველაზე რთული გამოცდილებაა, მაგრამ მე მაინც შემართებით ვარ, რომ ერთ დღესაც სცენაზე დავბრუნდები და ნორმალური ცხოვრებით ვიცხოვრებ. მადლიერი ვარ სიყვარულისა და მხარდაჭერისთვის ჩემი შვილების, ოჯახის, გუნდისა და ყველა თქვენგანისგან!”
