18 ივნისს ჯასტინ ტიმბერლეიკი პოლიციამ ნასვამ მდგომარეობაში ავტომობილის მართვისას გააჩერა, მეორე დილით კი მომღერალი სამართალდამცავებმა დააკავეს. გარდა მედიის ყურადღებისა, აღმოჩნდა, რომ პოლიციის განყოფილებაში გადაღებული არტისტის ფოტოები შემოქმედებით შთაგონებად და ხელოვნების ნიმუშად იქცა. ფოტოების ინსპირაციით შექმნილი ნამუშევრები საგ ჰარბორში მდებარე გალერეაშია განთავსებული. ვიზუალური ნამუშევარი არტისტმა გადფრი ლომენმა შექმნა. ფოტო პოპ-არტის სტილში, რამდენიმე ფერშია წარმოდგენილი.
გალერეა კერძო პირს, რომანი კრამორისს ეკუთვნის, რომელმაც ნამუშევრით აღფრთოვანება საჯაროდ გამოხატა. „ღმერთო ჩემო, ეს შესანიშნავია, უბრალოდ შესანიშნავი – სწორედ ასეთი რეაქცია მქონდა,” – უთხრა მან ჟურნალ Page Six-ს. როგორც კრამორისმა აღნიშნა, ეს ნამუშევარი გალერეაში წარმოდგენილ კოლექციაში ყველაზე თანამედროვე ხელოვნების ნიმუშია.
წარსულში რომანი კრამორისის გალერეა არც ისე დიდი პოპულარობით გამოირჩეოდა. როგორც გალერეის 44 წლის მფლობელმა ჟურნალთან ინტერვიუში თქვა, ამ დრომდე 2-3 ნამუშევარი გაიყიდა და თითოეულის ფასი 520 დოლარო იყო. „ახლა კი უამრავი ადამიანი გვსტუმრობს,”- თქვა კრამორისმა.
დაკავების პერიოდში ჯასტინ ტიმბერლეიკი საკონცერტო ტურნეს ფარგლებში სხვადასხვა ქალაქში შოუებს მართავს. სამართალდამცავებთან ინციდენტის მიუხედავად, ტურნე გეგმის მიხედვით გრძელდება.
29 ივნისს ბოსტონში გამართული კონცერტისას მომღერალი დაკავების ფაქტს იუმორით გამოეხმაურა და სცენიდან იკითხა, იყო თუ არა აუდიტორიაში ვინმე, ვინც იმ ღამით ავტომობილს მართავდა. ტიმბერლეიკმა მალევე განმარტა, რომ ეს ხუმრობა იყო და გამოსვლა განაგრძო.
