როგორც ჩანს, კამალა ჰარისმა საარჩევნო კამპანიის ოფიციალური სიმღერა იპოვა. რამდენიმე დღის წინ ვიცე-პრეზიდენტი საკუთარ გუნდთან შეხვედრაზე ბიონსეს Freedom-ის ფონზე წარდგა. ახლა კი თავისი პირველი საარჩევნო ვიდეო გამოაქვეყნა, რომელშიც სწორედ 2016 წლის ეს ჰიტი ჟღერს.
ვიდეოში, რომელიც ჰარისმა სოციალურ მედიაში გაავრცელა, ვიცე-პრეზიდენტი მხარდამჭერებს კითხვით მიმართავს: „როგორ ქვეყანაში გვინდა ცხოვრება?”
„არსებობენ ადამიანები, რომლებიც ფიქრობენ, რომ ჩვენ ქაოსის, შიშისა და სიძულვილის ქვეყანაში უნდა ვცხოვრობდეთ,” – განაგრძობს ჰარისი, რომლის სიტყვებიც დონალდ ტრამპის კადრებით არის გადაფარული. „მაგრამ ჩვენ? ჩვენ ვირჩევთ სრულიად სხვა რამეს. ჩვენ ვირჩევთ თავისუფლებას.”
„თავისუფლება არა იმისთვის, რომ უბრალოდ ვიცხოვროთ, არამედ იმისთვის, რომ წინ წავიდეთ. თავისუფლება იმისთვის, რომ დაცულები ვიყოთ იარაღით ძალადობისგან. თავისუფლება იმისთვის, რომ ჩვენს სხეულთან დაკავშირებულ არჩევანს თავად ვაკეთებდეთ… ჩვენ გვჯერა ამერიკის პირობის და მზად ვართ, ვიბრძოლოთ მისთვის. რადგან როცა ვიბრძვით, ვიგებთ.”
სიმღერა Freedom, კენდრიკ ლამარის მონაწილეობით, შესულია ბიონსეს 2016 წლის Billboard 200-ის ლიდერ ალბომში Lemonade. როგორც ჩანს, 8 წლის შემდეგ მომღერალმა ჰარისს სიმღერის საარჩევნო კამპანიაში გამოყენების ნება დართო. „სიენენის” ცნობით, ბიონსემ ნებართვა ძალიან სწრაფად გასცა, სულ რაღაც რამდენიმე საათით ადრე, სანამ ჰარისი საკუთარი გუნდის წინაშე წარდგებოდა.
კამალა ჰარისის მხარდამჭერთა რიცხვშია ბიონსეს დედა ტინა ნოულზიც. მან სოციალურ ქსელში ვიცე-პრეზიდენტთან ერთად გადაღებული ფოტო და ჰარისის მხარდამჭერი პოსტი გამოაქვეყნა.
ნახეთ კამალა ჰარისის საარჩევნო კამპანიის ვიდეო:
