დონალდ ტრამპმა ხელოვნური ინტელექტის შესახებ ისაუბრა მას შემდეგ, რაც სოციალური ქსელის ანგარიშზე ტეილორ სვიფტის ყალბი ფოტოები გადააზიარა, თითქოსდა, მომღერალი მის საპრეზიდენტო კამპანიაში ჩაება.
„ეს ფოტოები მე არ გამიკეთებია,” – თქვა ტრამპმა Fox-თან ინტერვიუში. „ამას სხვა ადამიანები აკეთებენ. Ხელოვნური ინტელექტი ძალიან საშიშია ამ კუთხით.”
„ეს ჩემი მისამართითაც ხდება,” – აღნიშნა ყოფილმა პრეზიდენტმა. „ისინი აკეთებენ ჩემს ვიდეოებს, სადაც „მალაპარაკებენ”. ხელოვნური ინტელექტის მეშვეობით აბსოლუტურად იდეალურად „ვსაუბრობ” და რაღაც პროდუქტებს „ვარეკლამებ”. ეს ნამდვილად საშიშია.”
წინა კვირას ტრამპმა თავის ანგარიშზე გადააზიარა ხელოვნური ინტელექტის მიერ დაგენერირებული ფოტოები, რომლებშიც ტეილორ სვიფტი, თითქოსდა, მისი მხარდამჭერია. ფოტოებზე წარმოდგენილი არიან ტეილორ სვიფტის ფანები, რომლებსაც აცვიათ მაისურები წარწერით Swifties for Trump. „სვიფტის გულშემატკივრები ტრამპისკენ არიან მას შემდეგ, რაც ISIS-მა ტეილორის კონცერტები ჩაშალა,” – ვკითხულობთ ფოტოზე.
კიდევ ერთ ფოტოში ამერიკის დროშის ფონზე ამავე ფერებში ჩაცმული ტეილორ სვიფტია მესიჯით: „ტეილორს უნდა, რომ ხმა დონალდ ტრამპს მისცე.”
ტრამპმა აღნიშნული ფოტოები თავის სოციალურ გვერდზე გადააზიარა წარწერით: „ვეთანხმები!”
რეალურად, ამ ეტაპზე სვიფტს მხარი საპრეზიდენტო არჩევნების არც ერთი კანდიდატისთვის არ დაუჭერია. მანამდე, 2020 წელს, იგი მხარს ჯო ბაიდენს უჭერდა.
ნახეთ ტრამპის ინტერვიუ:
