ნინი ბრეგვაძემ, იგივე ნინი აირისმა ამერიკის ეროვნული საფეხბურთო ლიგის თამაშზე აშშ-ის ჰიმნი შეასრულა. ამის შესახებ ქართველი მომღერალი სოციალურ ქსელში წერს და სიმღერის ვიდეოს აქვეყნებს.
„ჩემთვის, როგორც თბილისში, საქართველოში დაბადებული და გაზრდილი და საცხოვრებლად ნიუ-იორკში გადასული ადამიანისთვის, ძალიან დიდი პატივია 70 000 ადამიანის წინაშე ეროვნული ჰიმნის სიმღერა სუპერ თასის მიყოლებით ორგზის ჩემპიონ The Kansas City Chiefs-ისა და Detroit Lions-ის თამაშზე. ეს ისეთი მომენტია, რომლის გამოცდის შესაძლებლობა ცოტა ადამიანს თუ ეძლევა, განსაკუთრებით მათ, ვინც ერთი წელიც არაა, რაც აშშ-ს მოქალაქეობა მოიპოვა. ჩემთვის პატივია, რომ ვარ როგორც საქართველოს, ასევე აშშ-ის მოქალაქე,” – წერს ნინი ბრეგვაძე.
ეროუჰედის სტადიონზე კანზასში The Kansas City Chiefs-სა და Detroit Lions-ს შორის ეროვნული საფეხბურთო ლიგის მატჩი შედგა. თამაში The Kansas City Chiefs-ის დამარცხებით დასრულდა, სადაც ტეილორ სვიფტის ბოიფრენდი ტრევის კელსი თამაშობს.
