Billboard-ის რედაქცია ჯენიფერ ლოპესის განქორწინების განცხადებას გაეცნო. განაცხადში მომღერალი ითხოვს, რომ ოფიციალურად კვლავ მისი უწინდელი გვარი მიანიჭონ. ბენ აფლეკზე სამოქალაქო ქორწინებისას მომღერალმა გვარი შეიცვალა და ჯენიფერ ლინ აფლეკად დარეგისტრირდა. განქორწინების შემდეგ კი მას სურს, ოფიციალურ დოკუმენტებში კვლავ ჯენიფერ ლინ ლოპესის სახელით იყოს წარმოდგენილი.
გარდა ამისა, ჯენიფერ ლოპესმა კალიფორნიის სასამართლოს თხოვნით მიმართა, რომ ორივე მხარეს ერთმანეთისაგან ფინანსური კომპენსაციის მიღებაზე უარი უთხრას. წყვილმა განქორწინება შეუღლებიდან ორი წლის შემდეგ გადაწყვიტა. როგორც NBC News-ს ლოპესთან დაახლოებულმა ანონიმურმა წყარომ განუცხადა, წყვილს საქორწინო კონტრაქტი არ გაუფორმებია.
ბენ აფლეკი და ჯენიფერ ლოპესი 2022 წელს დაინიშნნენ. ეს წყვილისათვის ქორწინების მეორე გადაწყვეტილება იყო. პირველად მომღერალი და მსახიობი 20 წლის წინ დაინიშნენ და შემდეგ ერთმანეთს ქორწინებამდე დაშორდნენ. ლოპესმა 1998 წელს ოხანი ნოაზე იქორწინა, თუმცა1998 წელს მისი პირველი ქორწინება დასრულდა. 2001-2003 წლებში ლოპესი მოცეკვავე კრის ჯადზე იყო დაქორწინებული. 2004 წელს კი მომღერალ მარკ ენტონიზე, ვისთან ქორწინებამაც ათ წელს გასტანა. ენტონისგან ლოპესს ტყუპი შვილი – ემი და მაქსი შეეძინა.
ბენ აფლეკთან ურთიერთობის აღდგენამდე ლოპესი Yankees-ის მოთამაშეზე, ალექს როდრიგესზე იყო დანიშნული. ბენ აფლეკისა და ჯენიფერ ლოპესის განახლებული ურთიერთობა საკმაოდ ხმაურიანი მოვლენა იყო. მათ წყვილს საზოგადოება “ბენიფერის” სახელითაც მოიხსენიებდა. ლოპესმა მისი და აფლეკის ურთიერთობის ქრონოლოგიას რამდენიმე ნამუშევარი მიუძღვნა. მათ შორის არის დოკუმენტური ფილმი The Greatest Love Story Never Told.
როგორც აღმოჩნდა, ფილმის მიმართ საზოგადოების ინტერესი განსაკუთრებით გაიზარდა მას შემდეგ, რაც ინტერნეტში წყვილის განქორწინების ამბავი გავრცელდა. Luminate U.S.-ის მონაცემებით Prime Video- ზე 24 საათში ფილმის ყურების მაჩვენებელი 10.7 ათასი საათიდან 354.1 ათას საათამდე გაიზარდა.
