ჯგუფმა Linkin Park სოციალური მედიის არხებზე 100-საათიანი უკუთვლის ვიდეო გააზიარა. ამ აქტივობის შესახებ ბევრი არაფერია ცნობილი, გარდა იმისა, რომ პოსტის აღწერაში ბენდის ოფიციალური ვებ-გვერდია მითითებული.
ვებ-გვერდზე ასევე გამოჩნდა youtube-ზე ცოცხალ რეჟიმში გაშვებული ვიდეოს ბმული. ვიდეოს ჩათის ფუნქციაც აქვს გააქტიურებული, სადაც ფანები თავის მოსაზრებებს გამოთქვამენ. ერთ-ერთი სპეკულაციის მიხედვით, ბენდმა ახალი ვოკალისტი უნდა წარადგინოს, რომელიც გარდაცვლილ ჩესტერ ბენინგტონს შეცვლის. არტისტმა 2017 წელს, 41 წლის ასაკში სიცოცხლე თვითმკვლელობით დაასრულა.
„ვფიქრობ, ისინი ახალ მომღერალს წარადგენენ. Linkin Park იმსახურებს, რომ თავისი შემოქმედებითი მემკვიდრეობა გააგრძელოს,” – წერს ერთ-ერთი მომხმარებელი. „თუ LP-ის ახალი მომღერალი ჰყავს და ის ქალია, ვინ გინდათ, რომ იყოს?”-კითხულობს კიდევ ერთი ფანი.
Linkin Park-ის მიერ გამოქვეყნებული დროის ათვლა 28 აგვისტოს დასრულდება. წლის დასაწყისში წყარომ Billboard-ს გაუმხილა, რომ შესაძლოა, ბენდის წევრები 2025 წელს კვლავ გაერთიანდნენ და საკონცერტო ტურნე დაიწყონ. წყარომ ასევე აღნიშნა, რომ ჯგუფი ქალი ვოკალისტის აყვანას გეგმავს. წყაროს თქმით, აპრილში მუსიკალური ბუქინგ სააგენტო WME ჯგუფის პოტენციურ ტურნესთან დაკავშირებით შეთავაზებებსაც იღებდა. მათ შორის იყო ფესტივალებიც.
გავრცელებული სპეკულაციების პარალელურად, ჯგუფ Orgy-ს წევრმა ჯეი გორდონმა რადიო გადაცემაში სტუმრობისას განაცხადა, რომ Linkin Park-ის დაბრუნებასთან დაკავშირებით ჭორები გაიგო.
„ძალიან, ძალიან მაგარი ბიჭები არიან და ცხადია, დიდებული ბენდია, “ – აღნიშნა გორდონმა. „ჩესტერის გარეშე რთული იქნება, მაგრამ ვნახოთ. გავიგე, რომ მათ ქალი მომღერალი ეყოლებათ.”
მოგვიანებით გორდონმა განცხადება გაავრცელა და განმარტა, რომ Linkin Park-ზე საუბრისას მისი სიტყვები კონტექსტიდან ამოღებულად გავრცელდა. „Linkin Park-ის მომღერალთან დაკავშირებით არაფერი ვიცი,” – წერდა მუსიკოსი.
ხმების გავრცელების შემდეგ პრესამ კომენტარი სთხოვა ჯგუფის თანადამფუძნებელ მაიკ შინოდას.
„ჭორები ყოველთვის იქნება. ხალხი ყოველთვის იკითხავს, რას აპირებს ბენდი. ამაზე საუკეთესო პასუხი არის ის, რომ როცა რაიმე გვექნება სათქმელი, აუცილებლად გეტყვით,” – უთხრა არტისტმა ჟურნალ Revolver-ს. „როცა რაიმეს დაანონსების დრო მოვა, ის LinkinPark.com-ზე გამოქვეყნდება. თუ რამე ამბავი სხვისგან გაიგეთ, მას შეგიძლიათ ენდოთ იმდენად, რამდენადაც თქვენ გსურთ.”
Linkin Park 2000-იანი წლების ერთ-ერთი ყველაზე წარმატებული როკბენდია. ჯგუფს შეერთებული შტატების მასშტაბით 29.4 მილიონზე მეტი ალბომი აქვს გაყიდული. სხვადასხვა დროს ჯგუფის 24 სიმღერა Billboard Hot 100-ის ჩარტში მოხვდა. მათ შორის იყო ჰიტები In the End, What I’ve Done და New Divide.
ნახეთ Linkin Park-ის ახალი იდუმალი საანონსე პოსტი:
