თამადა ამერიკულ ტურნეში მიდის. ინფორმაციას ამის შესახებ მუსიკოსი სოციალური ქსელით ავრცელებს და აშშ-ის პირველ კონცერტს აანონსებს. უფრო ვრცლად ტურნეს დეტალებზე თამადა Billboard საქართველოს ესაუბრა:
თამადა:
„ამერიკაში ოქტომბრის დასაწყისში მივდივარ. პირველი ლაივი 19 ოქტომბერს მექნება Public Records-ში, რომელიც ბრუკლინში ძალიან ცნობილი ლოკაციაა. უკვე დაგეგმილია მეორე კონცერტიც, რომელიც 5 ნოემბერს ბერკლის უნივერსიტეტში შედგება. იქ იმართება Middle Eastern Festival, რომლის ფარგლებშიც იქნება საქართველოს დღე. მასში მონაწილეობას მიიღებს გიორგი მიქაძეც. ჩემთან ერთად კი დაუკრავს ბერკლის უნივერსიტეტის სტუდენტების ბენდი.
ამის შემდეგ ისევ ნიუ-ორკში ვაპირებთ კიდევ ერთ კონცერტს 9 ნოემბრისთვის. ამ ეტაპზე მიმდინარეობს მოლაპარაკებები სან-ფრანცისკოსა და ლოს-ანჯელესის ლაივების თარიღებზეც და უახლოეს მომავალში უკვე სრული ტურნეს დეტალებს გამოვაქვეყნებთ.
ეს ჩემი პირველი გასვლაა აშშ-ში. სამწუხაროდ, ლექსო რატიანი ჩემთან ერთად არ იქნება, ვიზის უქონლობის გამო. ამიტომ დავუკრავ მოწვეულ მუსიკოსებთან ერთად. რეპერტუარი იგივე გვექნება და ვამატებ კიდევ ახალ ჟღერადობას, რომელიც 2025 წელს გამოვა. ჯერჯერობით ამით ვიწყებთ. დიდი ინტერესი მოდის სხვადასხვა შტატიდან და სამომავლოდ გეგმებიც დიდი გვაქვს.”
