1-ელ სექტემბერს ცნობილი ამერიკელი არტისტი Oliver Tree მსოფლიო ტურნეს ფარგლებში კონცერტს თბილისში გამართავს. ეს საქართველოში მისი პირველი შოუ იქნება, რომელიც Elektroyard-ში შედგება. მუსიკოსი ტურნეს ფარგლებში თავის ახალ ალბომს – ALONE IN A CROWD-ს წარადგენს.
თბილისში დაგეგმილ კონცერტს არტისტი პოსტით გამოეხმაურა. მისი შინაარსიდან ირკვევა, რომ მუსიკოსისათვის საქართველო კარგად ნაცნობი ქვეყანაა:
„1-ელ სექტემბერს კონცერტს გავმართავ თბილისში, რომელიც ჩემი ერთ-ერთი საყვარელი ადგილია მსოფლიოში საუკეთესო კერძებით. მოუთმენლად ველი თქვენთან შეხვედრას,” – წერს Oliver Tree და აქვყენებს ვიდეოს, რომელშიც ის სიმღერა Star-ის ფონზე ქართლის დედისკენ მიფრინავს, მკერდზე საქართველოს დროშის პინით.
Oliver Tree ავტორ-შემსრულებელი, პროდიუსერი და რეჟისორია. მისი ჟანრობრივი მიმართულება აერთიანებს ინდი პოპს, ალტერნატიულ პოპსა და ჰიპ-ჰოპს. 2017 წელს მან კონტრაქტი გააფორმა ცნობილ მუსიკალურ ლეიბლ Atlantic Records-თან. მსოფლიო პოპულარობა კი არტისტს 2021 წელს გამოცემულმა სიმღერამ Life Goes On და 2022 წლის ნამუშევარმა Miss You მოუტანა, რომელიც ვირუსულად გავრცელდა სხვადახვა ონლაინ პლატფორმაზე.
Oliver Tree-ს ნამუშევრებს დღესდღეობით 4 მილიარდზე მეტი გლობალური სტრიმი აქვს. არტისტი განსაკუთრებით პოპულარულია TikTok-ზე, სადაც მისი გამომწერთა რიცხვი 15 მილიონს აღწევს.
კონცერტის შესახებ დეტალებს გაეცანით ბმულზე.
