წინანდლის ფესტივალის მე-6 სეზონის გახსნამდე რამდენიმე კვირით ადრე თბილისს მსოფლიოში აღიარებული დირიჟორები ეწვივნენ.
საქართველოში იმყოფება ფესტივალის მუსიკალური ხელმძღვანელი ჯანანდრეა ნოზედა, რომელიც, ტრადიციულად, პანკავკასიურ ორკესტრთან ერთად ფესტივალის გახსნაზე წარდგება. ჯანანდრეა ნოზედას მოწვევით კი, მოსამზადებელ პროცესში ჩაერთო იტალიელი მაესტრო რობერტო გაბიანიც, რომელმაც თბილისის ოპერისა და ბალეტის თეატრის გუნდი ვერდის რეკვიემის შესასრულებლად მოამზადა. 31 აგვისტოს ფესტივალი სწორედ ვერდის რეკვიემით გაიხსნება, რომელსაც პანკავკასიური ორკესტრი, სოპრანო ერიკა გრიმალდი, მეცო-სოპრანო აგნეშკა რელისი, ტენორი მარკო მიმიკა და თბილისის ოპერისა და ბალეტის თეატრის გუნდი ჯანანდრეა ნოზედას დირიჟორობით შეასრულებენ.
თბილისს ასევე ეწვია ცნობილი იტალიელი დირიჟორი და პანკავკასიური ორკესტრის დამხმარე მუსიკალური ხელმძღვანელი კლაუდიო ვანდელი, რომელმაც თბილისის ახალგაზრდულ ორკესტრთან იმუშავა. ორკესტრი ფესტივალის სცენაზე კანადელ პიანისტ ბრუს ლიუსთან ერთად 2 სექტემბერს სწორედ ვანდელის დირიჟორობით წარდგება. შესრულდება შოპენისა და ბეთჰოვენის ნაწარმოებები.
ნახეთ Billboard საქართველოს რეპორტაჟი ცნობილი დირიჟორების სამუშაო პროცესიდან:
