პირველ სექტემბერს Dior-მა მოდის სახლის ბესტსელერი სუნამოს, J’Adore-ის ახალი სახე, რიანა, ოფიციალურად წარადგინა. Dior-მა სუნამოს ახალ ეპოქას ვიდეოც მიუძღვნა, რომელიც სტივენ კლაინის მიერ არის გადაღებული. ამგვარად, რიანამ J’Adore-ის უწინდელი ცნობილი სახე, მსახიობი შარლიზ თერონი შეცვალა.
„ძლიერი, კაშკაშა და შთამაგონებელი. რიანა სტივენ კლაინის ობიექტივში J’adore-ის ტრიუმფალურ და თავისუფალი სულის მატარებელ ფემინურობას განასახიერებს,” – ვკითხულობთ YouTube-ზე გამოქვეყნებული ვიდეოს აღწერაში. „J’adore და რიანა – ახალი ოქროს ოცნებები იწყება.”
ერთწუთიან ვიდეოს ფონად რიანას 2016 წლის ჰიტი, Love on the Brain გასდევს. რეკლამა ვერსალის სასახლეშია გადაღებული. „შენი ოცნებები – აქციე ისინი რეალობად,” – ამბობს რიანა ვიდეოში.
Dior-მა რიანა J’adore-ის სახედ ზაფხულში დაასახელა. ვარსკვლავს ბრენდთან დიდი ხნის ურთიერთობა აკავშირებს – მომღერალი ხშირად ესწრება Dior-ის მოდის ჩვენებებს და 2015 წელს ის მოდის სახლის პირველი შავკანიანი ამბასადორი გახდა.
„ორ ათწლეულზე მეტია, ეს სუნამო ქალების ერთგული და არაჩვეულებრივი თანამგზავრია. ეს არის ძლიერი, თავისუფალი და დამოუკიდებელი ქალების სუნამო, რომელიც არაჩვეულებრივად უკავშირდება რიანას პირად ისტორიას,” – აღნიშნულია Dior-ის მფლობელი კონგლომერატის, LVMH-ის განცხადებაში.
„ეს სუნამო, რომელსაც დიდი ხანია ვიცნობ და მიყვარს, ქალებისთვის ძალიან
ბევრს ნიშნავს,” – ვკითხულობთ ზაფხულში გავრცელებულ იმავე პრესრელიზში. ვარსკვლავმა განაცხადა, რომ მისთვის J’adore უფრო მეტია, ვიდრე სუნამო და ბედნიერია, რომ ამ ისტორიის ნაწილი ხდება.
ნახეთ J’adore-ის ახალი ვიდეო რიანას მონაწილეობით:
