კენდრიკ ლამარი 2025 წლის Super Bowl-ის ტაიმებს შორის გამართული მუსიკალური შოუს ჰედლაინერად დასახელდა. ღონისძიება 9 თებერვალს, ლუიზიანის შტატის ქალაქ ახალ ორლეანში გაიმართება. მუსიკალურ შოუს Apple Music წარადგენს.
ეს მეორე შემთხვევაა, როცა რეპერი ამერიკული ფეხბურთის ეროვნული ლიგის მთავარ ღონისძიებაზე წარდგენა. პირველად Super Bowl-ის მუსიკალური შოუს სცენაზე კენდრიკ ლამარი 2022 წელს სპეციალური სტუმრის სტატუსით გამოჩნდა. 2025 წელს კი პირველი შემთხვევაა, როცა ის შოუს მთავარი არტისტია.
„რეპი კვლავაც ყველაზე გავლენიანი ჟანრია და მე იქ ვიქნები, რათა მსოფლიოს ეს შევახსენო”, – წერს კენდრიკ ლამარი.
კენდრიკ ლამარის შოუს სამხატვრო გაფორმებაზე pgLang იზრუნებს. pgLang მულტიდისციპლინური კრეატიული სააგენტოა, რომლის თანადამფუძნებელი თავად კენდრიკ ლამარია.
2024 წელს ლამარისათვის მნიშვნელოვანი პერიოდი იყო, მოუხედავად იმისა, რომ რეპერს ახალი ალბომი 2022 წლის შემდეგ არ გამოუცია. ერთ-ერთი დიდი სიახლე ის იყო, რომ კენდრიკმა ტრეკი Not Like Us გამოსცა, რომლითაც დრეიკს დაუპირისპირდა და რამაც დიდი ხმაური გამოიწვია. ჩანაწერი ორი კვირის განმავლობაში Billboard-ის Hot 100-ის ჩარტში ლიდერობდა.
Super Bowl-ის მუსიკალური შოუს პირდაპირი ტრანსლაცია ტელეარხ Fox-ზე შედგება. შოუ ახალი ორლეანის Caesars Superdome-დან გადაიცემა. გარდა ამისა, ეს იქნება მეექვსე წელი, რაც შოუ პროგრამაზე Roc Nation ზრუნავს. Roc Nation მუსიკალური შოუს პროდიუსინგზე ჯესი კოლინზთან ერთად იმუშავებს. შოუს ორგანიზებაში NFL-თან სპეციალური პარტნიორობის ეგიდით ასევე ჩართულია Jay Z.
„კენდრიკი ნამდვილად ისეთი არტისტი და შემსრულებელია, როგორებიც თაობებში ერთხელ იბადებიან. მისი დიდი სიყვარული ჰიპ-ჰოპისა და კულტურის მიმართ მის არტისტულ ხედვას განსაზღვრავს. მას აქვს უნარი გლობალურად მოახდინოს კულტურული გავლენა. კენდრიკის შემოქმედება მუსიკას აღემატება და მისი გავლენა წლების განმავლობაში დარჩება,” – განაცხადა Jay Z-მ.
2025 წლის Super Bowl-ის მუსიკალური შოუს მთავარი სპონსორია Apple Music. პირველი შოუ, რომელიც Apple Music-მა წარადგინა, რიანამ გააფორმა. 2024 წელს კი ჰედლაინერი აშერი იყო.
„არც თუ ბევრ შემსრულებელს აქვს მუსიკასა და კულტურაზე ისეთი გავლენა, როგორც კენდრიკ ლამარს,” – აღნიშნა NFL-ის მუსიკალური მიმართულების ხელმძღვანელმა სეთ დუდოვსკიმ. მისი თქმით, დროსთან ერთად კენდრიკი კვლავაც ამტკიცებს, რომ აქვს შესაძლებლობა შექმნას მომენტი, რომელიც განსაზღვრავს ჰიპ-ჰოპ მუსიკას.
.
