გამოცემა Entertainment Tonight-ის თანახმად, თავდაპირველად ტიტო ჯექსონის გარდაცვალების შესახებ ინფორმაცია ჯექსონების ოჯახის დიდი ხნის მეგობარმა, სტივ მანინგმა გაავრცელა. მისი თქმით, ტიტო ჯექსონი სავარაუდოდ გულის შეტევით, ნიუ-მექსიკოდან ოკლაჰომაში მგზავრობის დროს გარდაიცვალა. მოგვიანებით ჟურნალს People ტიტოს დისშვილმა, სიგი ჯექსონმა დაუდასტურა ინფორმაცია.
BREAKING: Tito Jackson has died at the age of 70.
— Entertainment Tonight (@etnow) September 16, 2024
Steve Manning, a longtime Jackson family friend and former Jackson family manager, tells ET that Tito passed away today. While an official cause of death has not yet been determined, Manning believes that Tito suffered a heart… pic.twitter.com/coZCZm3T9i
ტიტო ჯექსონი 1953 წლის 15 ოქტომბერს ინდიანას შტატში დაიბადა. მუსიკა მისი ოჯახური დინასტიის განუყოფელი ნაწილი იყო. 1960-იან წლებში ტიტომ ძმებთან, მაიკლთან, ჯერმეინთან, მარლონთან და ჯეკისთან ერთად ბენდი The Jackson 5 დააარსა. მოგვიანებით, 1997 წელს, ბენდი როკ-ენ-როლის დიდების დარბაზში შეიყვანეს.
ტიტოს რიტმ გიტარის პარტიებითა და ძმების ჰარმონიული ხმებით ძმებმა მუსიკალურ წარმატებას მალევე მიაღწიეს. 1968 წელს ბენდმა Motown Records-თან გააფორმა ხელშეკრულება. მათი სადებიუტო სინგლი I Want You Back სენსაციად იქცა და ბილბორდ 100-ში პირველ ადგილს მიაღწია, ისევე, როგორც მათმა შემდგომმა ჰიტებმა – ABC და I’ll Be There.
მიუხედავად იმისა, რომ საოჯახო ბენდში უმცროსი ძმა მაიკლი ხშირად იპყრობდა ყურადღებას, ტიტოს ბენდში ყოფნას წარმატებისთვის გადამწყვეტი მნიშვნელობა ჰქონდა. The Jackson 5-ის სადებიუტო ალბომმა Diana Ross Presents The Jackson 5 (1969) დასაბამი მისცა ბენდის საოცარ პოპულარობას. ამ ეპოქის მრავალი ტრეკი კი მუსიკალური კულტურის სტანდარტად იქცა.
1970-იან წლებში ბენდმა რებრენდიგი განიცადა, სახელი შეიცვალა და The Jacksons-ის სახელით გამოდიოდა. ტიტომ 1980-იან წლებში ძმებთან ერთად მრავალი ტურნე და შოუ გამართა. მას უდიდესი წვლილი აქვს ალბომების Destiny და Triumph-ის შექმნაში, რომელმაც ბილბორდ 200-ში და R&B ჩარტებში დიდ წარმატებას მიაღწია.
The Jackson 5-თან მუშაობის გარდა, 2016 წელს, ტიტო ჯექსონმა სოლო კარიერა დაიწყო, გამოსცა სადებიუტო ალბომი Tito Time, მისმა სინგლმა Get It Baby კი ბილბორდის Adult R&B Airplay ჩარტში მეცხრამეტე ადგილი დაიკავა.
ტიტო ჯექსონს ჰყავს სამი ვაჟი – ტაჯი, ტარილი და ტიჯეი, რომლებმაც საკუთარი მუსიკალური ჯგუფი, 3T შექმნეს.
