მას შემდეგ, რახ Super Bowl-ის მუსიკალური შოუს ჰედლაინერი ცნობილი გახდა, დაანონსებული ღონისძიება მედიის ყურადღების ცენტრშია. ახლახან შოუს პროდიუსერ ჯესი კოლინსს ინტერვიუს დროს ჰედლაინერის არჩევანზე ჰკითხეს. ბოლო დღეებია ინტერნეტში აქტიურად განიხილებოდა ის, რომ 2025 წლის Super Bowl მუსიკალურად ლილ უეინს უნდა გაეფორმებინა, რადგან მატჩი ახალ ორლეანში, უეინის მშობლიურ ქალაქში იმართება.
„ჩვენ გვიყვარს ლილ უეინი,” – აღნიშნა კოლინსმა Variety-ისთან საუბრისას და თქვა, რომ შემსრულებლების სავარაუდო ვინაობაზე ყოველთვის დიდი ფსონები იდება. „ვფიქრობ, კენდრიკ ლამარი არაჩვეულებრივ შესრულებას შემოგვთავაზებს და შოუ ყველას მოეწონება. ვიცი, რომ კენდრიკი გულმოდგინედ ემზადება, რათა შოუ არაჩვეულებრივი იყოს.”
ამის შემდეგ ჯესი კოლინსმა გაამხილა, თუ ვის ეკუთვნის საბოლოო სიტყვა ჰედლაინერის არჩევისას. მისი თქმით, ჯეი ზი არის ის ადამიანი, რომელიც საბოლოო გადაწყვეტილებას იღებს. „საბოლოო გადაწყვეტილება ჯეი ზის ეკუთვნის. მას შემდეგ, რაც ერთად ვმუშაობთ, ყოველი წლის ჰედლაინერზე საბოლოო სიტყვას ის ამბობს და ეს არაჩვეულებრივად გამოსდის. ყოველთვის სწორ არჩევანს აკეთებს,” – თქვა ჯესი კოლინსმა.
რამდენადაც Super Bowl ახალი სეზონით ახალ ორლეანში ბრუნდება, ბევრი ელოდა, რომ ტაიმებს შორის მუსიკალური შოუს შემსრულებელი არტისტი ლილ უეინი ინებოდა. ფაქტს, რომ ეს სტატუსი უეინს არ ერგო, ინტერნეტში გამოხმაურებაც მოჰყვა.
ჯეი ზიმ და კომპანია Roc Nation-მა NFL-თან თანამშრომლობა 2019 წელს დაიწყეს და ლიგის მუსიკალური შოუს სტრატეგიაზე პასუხისმგებლობა აიღეს.
