16 სექტემბერს Diddy ნიუ-იორკში დააკავეს, მას შემდეგ, რაც ნაფიც მსაჯულთა სასამართლომ ბრალი წაუყენა. Billboard-ის ცნობით, ბრალდების შესახებ დეტალები ჯერჯერობით უცნობია.
რეპერის ადვოკატის, მარკ აგნიფაილოს მიერ Billboard-ისათვის გაგზავნილ წერილში წერია: „ჩვენ იმედგაცრუებულები ვართ გადაწყვეტილებით, რომელიც ჩვენი აზრით, კომბსის უსამართლო დევნაა აშშ-ის პროკურატურის მიერ. Diddy მუსიკალური სფეროს ცნობილი ფიგურა და ანტრეპრენერია. ოჯახის მოსიყვარულე ადამიანი და ქველმოქმედი, რომელმაც ბოლო 30 წელი იმპერიის აშენებაში გაატარა. ის აღმერთებს შვილებს და მუშაობს შავკანიანთა საზოგადოების კეთილდღეობაზე. ის არ არის სრულყოფილი ადამიანი, მაგრამ ეს სისხლის სამართლის დანაშაული არ არის. ის თანამშრომლობს გამოძიებასთან და ამ ბრალდებებთან დაკავშირებით, თავისი ნებით წავიდა ნიუ-იორკში.” რეპერის ადვოკატმა საზოგადოებას ასევე მოუწოდა, ნუ იჩქარებენ მისი კლიენტის განსჯას, სანამ ფაქტები არ ექნებათ. მან ასევე აღნიშნა, რომ კომბსს არაფერი აქვს დასამალი და მოუთმენლად ელის, სასამართლოს ძალით საკუთარი რეპუტაციის აღდგენას.
New York Times-ის ინფორმაციით საბრალდებო დასკვნა დალუქულია და შესაბამისად ის საჯაროდ არ გამოცხადებულა. თუმცა, ადვოკატმა გამოცემას უთხრა, რომ ბრალდება რეკეტსა და ტრეფიკინგს ეხება. პარალელურად TMZ იუწყება, რომ კომბსი მანჰეტენზე მდებარე ფედერალურ განყოფილებაში გადაიყვანეს.
რეპერის წინააღმდეგ სულ მცირე რვა სამოქალაქო სარჩელია სასამართლოში შეტანილი. სარჩელები სექსუალურ ძალადობას ეხება. რეპერს უჩივის ყოფილი მეგობარი ქალი, კეისი ვენტურაც. რამდენიმე თვის წინ ინტერნეტში ვიდეოც გავრცელდა, სადაც ჩანს, ფიზიკურად როგორ ძალადობს კომბსი ვენტურაზე. ამ სარჩელების პარალელურად, Diddy-ის საქმეზე გამოძიებას აწარმოებს ფედერალური ბიუროც.
ბოლო სარჩელი მის წინააღმდეგ ამერიკული ჯგუფის, Danity Kane-ის წევრმა, დაუნ რიჩარდმა შეიტანა. მისი განცხადებით, Diddy მანიპულაციის მეშვეობით აჯერებდა, რომ მუსიკალურ ინდუსტრიაში ქალი არტისტისათვის წარმატების მოღწევა სექსუალურ ექსპლუატაციაზე გადიოდა. რიჩარდის თქმით, ის არაერთხელ შეესწრო ფაქტს, თუ როგორ ძალადობდა კომბსი კეისი ვენტურაზე. მომღერლის თქმით, კეისის და დანარჩენი ქალების მიერ შეტანილმა სარჩელებმა მას უბიძგა, ხმამაღლა ესაუბრა.
დაუნ რიჩარდის ბრალდების საპასუხოდ, კომბსის კიდევ ერთმა ადვოკატმა, ერიკა ვულფმა განაცხადა, რომ ამ ბრალდებით მისი კლიენტი „შოკირებული და იმედგაცრუებულია.”
