19 სექტემბერს მარჯანიშვილის თეატრის სცენაზე წარმოდგენა „მიქელანჯელო და რაფაელი: გენიალური და ღვთაებრივი” გაიმართება. სპექტაკლი საქართველოში იტალიის საელჩოს ორგანიზებით შედგება. სასცენო დადგმა ორი იტალიელი გენიოსის, მიქელანჯელოსა და რაფაელის შემოქმედებას ეძღვნება და მას 20-წლიანი ისტორიის მქონე ექსპერიმენტული თეატრალური დასი “Teatri 35” წარმოადგენს, რომელიც თბილისს კამპანიის რეგიონიდან ეწვია. თეატრის, სახვითი ხელოვნებისა და მუსიკის ერთობლიობით მსახიობები იტალიური რენესანსის ორი უდიდესი წარმომადგენლის ნამუშევრებს სცენაზე გააცოცხლებენ.
წარმოდგენას მუსიკალურად გააფორმებენ „საქართველოს სინფონიეტა”, ცნობილი ქართველი თეორბისტი გიორგი კუზანაშვილი და აზერბაიჯანელი კონტრტენორი ილჰამ ნაზაროვი. შესრულდება ვივალდის, ბახის, ჰენდელისა და ბაროკოს პერიოდის სხვა ცნობილი კომპოზიტორების ნაწარმოებები.
„მიქელანჯელო და რაფაელი: გენიალური და ღვთაებრივი” ერთ-ერთი ღონისძიებაა იმ ფართო პროგრამიდან, რომელსაც იტალიის საელჩო კამპანიის რეგიონის პოპულარიზაციის მიზნით ქართველ აუდიტორიას 2024 წლის შემოდგომაზე შესთავაზებს.
ბილეთების შეძენა შეგიძლიათ ბმულზე.
