5 ნოემბერს ბერკლის მუსიკალური კოლეჯის დიდი საკონცერტო დარბაზი პირველად უმასპინძლებს ქართული მუსიკის საღამოს და იქ მისულ მსმენელს საქართველოს გარშემო ამოგზაურებს. ღონისძიება, სახელწოდებით The Music of Georgia, ბერკლის ახლო აღმოსავლეთის ყოველწლიური ფესტივალის ფარგლებში გაიმართება. მისი ორგანიზატორია ქართველი მუსიკოსი და თავად ბერკლის კოლეჯის ასოცირებული პროფესორი გიორგი მიქაძე.
კონცერტზე შესრულდება ქართული საგუნდო და კამერულ-ინსტრუმენტული ნაწარმოებები და ასევე გიორგი მიქაძის საავტორო მუსიკა, რომელიც წარმოადგენს სხვადასხვა მუსიკალური ელემენტის, ტექნოლოგიის, ჟანრისა და სტილის სინთეზს ქართულ ტრადიციულ მუსიკასთან. კონცერტში მონაწილეობას მიიღებს „თამადაც”, რომელიც თბილისის ურბანულ კულტურას თანამედროვე ელექტრონული ჟღერადობით წარმოაჩენს.
მულტიჟანრულ კონცერტზე წარმოდგენილი იქნება ქართული ტრადიციული ინსტრუმენტებიც: დოლი, ჩონგური და ფანდური. სცენაზე ასევე წარდგებიან ბერკლის ქართველი სტუდენტები და აშშ-ში მცხოვრები ქართველი მუსიკოსები: გიორგი სუბელიანი და ელიბო იმერლიშვილი. საღამოს ქართული ცეკვის ელემენტებით გააფორმებს ცნობილი ქორეოგრაფი, „ტაურუსის“ მსოფლიო კასკადიორთა ჯილდოს მფლობელი ლაშა მძინარაშვილი.
ქართველი შემსრულებლების გარდა, კონცერტში მონაწილეობას მიიღებენ ბერკლის კოლეჯის პროფესორები და კურსდამთავრებულებიც. მათ შორის არიან ცნობილი გიტარისტი დეივიდ ფიუზინსკი, პლეტენიცას ბალკანური გუნდი და ბერკლის ახლო აღმოსავლეთის ფიუჟენ ანსამბლი ფესტივალის დამფუძნებლის, კრისტიანე ქარამის ხელმძღვანელობით.
პროექტი The Music of Georgia მიზნად ისახავს ქართული ხელოვნების საერთაშორისო აუდიტორიისთვის გაცნობას.
