Glamour-ის წლის ქალების დაჯილდოების ცერემონიას ჟურნალი Glamour ყოველწლიურად მართავს, სადაც პატივს მიაგებენ გავლენიან ქალებს სხვადასხვა სფეროდან.
8 ოქტომბერს, ნიუ-იორკში გამართულ Glamour-ის ღონისძიებაზე ბიონსეც იმყოფებოდა, სადაც ჟურნალმა წლის ქალის ჯილდო მის დედას, თინა ნოულზს მიანიჭა. ღონისძიებას ასევე ესწრებოდნენ ბილი აილიში, ანა ვინტური, კელი როულენდი, დემი ლოვატო და სხვა ვარსკვლავები. ღონისძიებაზე თინა ნოულზი აუდიტორიის წინაშე წარდგა და დედობრივი გრძნობის შესახებ ემოციური სიტყვა წარმოთქვა. სიტყვამ აუდიტორიაზეც იმოქმედა, თუმცა ბიონსეს განსაკუთრებით შეეხო და სუპერვარსკვლავს თვალებზე ცრემლი მოადგა.
“ჩემი შვილები ჩემს ცხოვრებაში ყველაზე დიდი სიხარულია, ისინი ჩემს გვერდით ყოველთვის იდგნენ, ჩემი ცხოვრების ყველაზე ცუდ და ყველაზე ბედნიერ მომენტებში მათგან თანადგომას და გამხნევებას ვგრძნობდი. ამ ყველაფერმა კი მაგრძნობინა, რომ ყველაფრის დაძლევა შემიძლია.” – თქვა აღელვებით თინა ნოულზმა.
„ყველაზე ხშირად მეკითხებიან ჩემ შვილებთან დაკავშირებით რა არის ის, რისიც ყველაზე მეტად მეამაყება. ჩემი პასუხი ყოველთვის ერთი და იგივეა: ყველაზე მეტად ვამაყობ იმით, თუ როგორი ადამიანები არიან ისინი.” – განაგრძო ემოციით აღსავსე თინა ნოულზმა
ღონისძიება თინა ნოულზის ჟურნალ Glamour-ის ყდაზე გამოჩენიდან რამდენიმე დღეში გაიმართა. გამოცემის ყდას ასევე ამშვენებდნენ ბილი აილიშის, სელენა გომესის და ტრევის კელსის დედები – მეგი ბაიარდი, მენდი ტიფი და დონნა კელსი.
ინტერვიუში თინა ნოულზი ბიონსეს ადრეულ ასაკს იხსენებს. მიუხედავად იმისა, რომ სუპერვარსკვლავმა პოპულარობა მოზარდობის ასაკში მოიპოვა, თინა მას ყოველთვის თავმდაბლობისკენ მოუწოდებდა.
იხილეთ ვიდეო, სადაც ბიონსე ემოციებს ვერ იკავებს თინა ნოულზის გამოსვლის დროს.
