2020 წელს, პანდემიის დროს, დუა ლიპა ინგლისის ეროვნული რადიოსადგურის მუსიკალური პროექტის, NPR Tiny Desk-ის სტუმარი იყო. მის მიერ შესრულებულმა კონცერტმა რეკორდი მოხსნა და დღემდე რჩება მუსიკალურ სესიად, რომელიც 130 მილიონზე მეტი ნახვით სხვა ეპიზოდებს შორის ლიდერობს. ახლახან დუა დაბრუნდა NPR-ის პროექტში და თავის ახალ ალბომში, Radical Optimism-ში შესული სიმღერები შეასრულა.
NPR-ის ჟურნალისტ არი შაპიროსთან ინტერვიუში მომღერალმა გაამხილა, რომ ალბომის ტრეკი Happy For You განსხვავებული ფორმით წარადგინა და ენერგიული სიმღერიდან ის ბალადად გადაიქცა, სადაც წამყვანი ჟღერადობა პიანინოსა და ვოკალის ერთობლიობაა. ვარსკვლავის თქმით, ამგვარად სიმღერა პირვანდელ, დახვეწილ ფორმას დაუბრუნდა, ელექტრონული მელოდიის გარეშე. „მგონია, რომ ამგვარად ეს სიმღერა სხვანაირად ჟღერს და ტექსტსაც მსმენელი განსხვავებულად აღიქვამს,“ – თქვა დუა ლიპამ.
NPR Tiny Desk-ის მუსიკალური სესია აკუსტიკურ ტონალობაში, Training Season-ით გაიხსნა. დუა ლიპას სიმღერის შესრულებისას აკომპანირებას შვიდკაციანი ბენდი უკეთებდა.
„ყოველთვის მინდოდა, აქ ვმდგარიყავი,“ – გაუმხილა დუა ლიპამ NPR-ის გუნდს. „Tiny Desk-ის პროექტში კონცერტი 2020-ში გავმართეთ. ასე რომ, აქ ყოფნა ჩემთვის მართლაც განსაკუთრებულია,“ – აღნიშნა ვარსკვლავმა და თქვა, რომ შთაგონებულია იმით, თუ როგორ წარმოაჩენენ ამ პლატფორმაზე არტისტები სიმღერებს ახალი ინტერპრეტაციებითა და მიგნებებით. დუა ლიპას თქმით, სწორედ ამიტომ გადაწყვიტა Happy For You განსხვავებულად შეესრულებინა: საცეკვაო ენერგიული პოპ სიმღერის ნაცვლად, არტისტმა ის პიანინოსა და ვოკალის მინიმალურ კომბინაციად აქცია, რამაც ტექსტსაც ახალი, მეტად სევდიანი შინაარსი შესძინა.
სესია დასრულდა ალბომის წამყვანი სინგლის, Houdini-ს შესრულებით, რომელიც ენერგიული ჟღერადობით გამოირჩევა.
