ავსტრალიის რადიოსადგურთან ინტერვიუში არიანა გრანდემ Wicked-ის შესახებ ისაუბრა. ჟურნალისტმა ჰკითხა, თუ რატომ გადაწყვიტა ვარსკვლავმა, რომ ფილმის სამსახიობო შემადგენლობაში დაბადების სახელით, არიანა გრანდე-ბუტერათი ყოფილიყო წარმოდგენილი, გრანდემ თქვა: „ეს ჩემი ბავშვობის სახელია! ეს პატარა არიანას სახელია. ეს გამოცდილება ჩემთვის შინ დაბრუნებას ჰგავდა. ბევრი რამ ვისწავლე გლინდასა და ელფაბასგან და ამ პროცესში თითქოს საკუთარ თავს დავუბრუნდი. ეს ის სახელია, რომლითაც სპექტაკლის სანახავად წავედი, როცა 10 წლის ვიყავი, და სიმბოლურად ამით სწორედ იმ ბავშვს მივაგებ პატივს,” – განმარტა არიანა გრანდემ.
არიანა გრანდე Wicked-ის შემოქმედებით გუნდთან ერთად ავსტრალიას ფილმის პრემიერისთვის ეწვია. დახურული პრემიერა სიდნეის State Theatre-ში 3 ნოემბერს
გაიმართა. არიანა გრანდემ წითელ ხალიჩაზე ვივიენ ვესტვუდის მოდის სახლის კოსტიუმი მოირგო, რომელიც სპეციალურად მისთვის შეიქმნა. კაბის კონცეფცია ფილმის ესთეტიკითა და მხატვრობით იყო შთაგონებული. ამავე დროს, სინთია ერივო, რომელიც Wicked-ში ელფაბას განასახიერებს, Louis Vuitton-ის შავი სკულპტურული კაბით წარდგა აუდიტორიის წინაშე.
Wicked-ს მაყურებელი ორ ნაწილად იხილავს. ისტორიის პირველი ნაწილი, კინოთეატრებში 22 ნოემბრიდან გამოვა.
